RK Dawla
Mb 9366095658
-- Advertisement --
1. April thla kan chuangkai a. Khawlum vanglai tak a ni âwm e. Hmun tlêm tê-ah chuan tuihâwk siam tham ruahtui an dawng zo chauh a, Mizoram hmun tam zawk erawh kan la khawro hle. Kan khawpui ber Aizawl tui pump (Tlawng lui) chuan ni tin tui pump tur duhkhawp a nei lo tan a, Lunglei khawpui pawhin tui pump tur duhkhawp tuihnâ a tlachham ta! Nikum kha La Nina a ni a, ruahtui kan dawng tha-in kan dawng rei a. Chuti chunga a kumleh lawkah, April thla tirah hetia tui hnâ a kiam ta vak mai hi eng vang nge ni ta ang le? Chîk zawka mipui nawlpuiin ngaihtuahna kan sên a tul ta hle mai. Vawiinah pawh heti hi kan nih chuan, kum 10/20 lo awm leh turah phei chuan, engtianga challenge nasa tak hmachhawn ang i maw?
2. Mizote hi Pi leh Pu atanga nunho thiam, khawtlang huap pawha lungrual dial dial kan ni thin. Mahsela, tunah chuan eizawnna leh tlatna mual a dang nasa ta. Biak Inah inkhawm tlang dial dial mah ila, mahni hma sial rêng rênga kan haw leh thin avangin, ram leh hnam ai chuan mahni chhungkaw hmakhua kan thlir lua ta thin a. Hei vang hian kan khawtlang leh ramin a tuar ta thin niin a lang. Mipui chan-ai eiru leh ruihhlo man tam zawrh avanga hausa nia kan rinhlelh rûkte ngei ngei pawh, kohhran leh khawtlanga an challang tlat zel thin hian, milem kan biakzia a tilang âwm e. Tangka sum ngainat hi sual tinrêng bul a nihzia Bible-ah kan hmu a. Sum tello chuan kan nung thei tawh lo, tunlaiah. Mahsela, kan ngainat dan hian ‘kut tling’ ai chuan ‘kut tling lo’ pawh a huam thui ta mah mahin a lang a. Hei vang hi a ni ang e, khawvela inkhawm tam ber hnamte hian zu zawrh mai mai pawh kan hlauh êm êm a, kan inhnial luih luih thin ni! Mi ramah chuan, kawtthlêrah an zuar mai mai a, a hnam angin an buaipui luih luih lo. Mi hausa, mi rama an ngaihsante chu Politician leh sawrkar hnathawk an ni ngai meuh lo, keini ramah chuan a dang si. Mi ramah, mi nawlpuiin tangka sum an ngainat dan leh kan ram mipui nawlpuiin tangka sum kan ngainat dan hi a dang bik em aw tih hi chhût tham niin a lang. Midangte hmuh theiha kan nun dan leh hmuh lova kan nundan inthlau lutuk nia lang hi a kristian lo tak zet a ni.
3. Mi tam takin farming kan luhchilh chhan pawh hi, ennawn fo a tul âwm e. Sum thawkchhuak tur ngar ngarin kan bei a. Hetiang mindset atân chuan, hlâwkna kha sum leh pai atang chauha teh a nih vangin, integrity a awm lo rêng rêng a. Mithiamte damdawi dose chawh bâka hman te, rin thu hmanga damdawi hlauhawm chi hrang hranga thlai enkawl leh a safe period thlen hmaa thlai sengkhawm maite a hluar duh êm êm ang. Hengte hi kutman ni lo mah se, a eitu ram mipuite kan hrisel loh êm êm dan atang hian ngaih a tha thei lo a ni. Farmer kan nih chuan, kan chhungkaw eitur, thlai tuihnai leh tharlam bâkah thilsiam dangte enkawl avanga kan hlimna kha a pawimawh hmasa phawt a. A dawtah bianga thlan tui fara hnathawh, taksa hriselna leh thawvenna kha a pawimawh leh a. A tâwp berah chuan, kan thlai hralhna hmanga midangte mamawh kan phuhrûk kha a pawimawh leh a ni. A hmasa lo tur kan hmasaktir chuan, sum leh pai bâwih-ah kan tâng ang a, engkim hlutna hi sum leh pai hmangin kan teh vek tawh mai ang. Chutianga rilru piangsual laklawh tawh chu Gospel camping chhawng tam tak pawhin kan tidam mai mai tawhin a rinawm loh. He kan damchhûng rei lo tê hi chhenfâkawm tak a lo nih theih nân, i fimkhurin i ngaihven teh ang u.