RK Dawla
Mb 9366095658
-- Advertisement --
1. April chawlhkar thumna kan hmang tan a. Khawlum leh ro hun rûnpui kan thleng mêk a. Mizoram hmar lamah chuan, lei rum lutuk tur tiziaawm turin ruah an dawng zeuh zeuh a. A bâk erawh kan la ro châr tha hlawm viau. Engpawhnise, Mizoram sik leh saa a lum ût hun vanglai kha kan thleng miau a. Hun reilotê-ah a mak a maka tam ruah bâkah thli, rial leh têk kan dawng leh têp tawh a. A lum viau kan tih pawh hian India phai khawlum thin ai chuan la lum nêp tak zawk kan ni e. Khawlum elkhên atanga an thlai tharchhuah hmangin min la châwm zel chu ania!
2. Kumin chu rawthing tâm vang hi nge ni, thlawhhma leh huanah Ram-âr an puang riauin a hriat a. Thlai chi tuh thin tân chuan, ram-âr hi hnawk ve tak thin an ni a. Loh theih loh vanga suat then a tul a nih pawhin, a pa (male) chauh kan bitum a tul hle. Ram-âr nu hi an tui mêk a, a then an awp tan a. Hei vang hian tûr hmanga hrai puk puk emaw a nu nen lama suat vek kha a tul ber love. Keini pawh kan paan mulch buhpawl kha Ram-âr hian an lo thai darh leh thin a. An chawr tan tawh avangin, a kung bul lei khawro lutuk kha an haw hle mai a. Chuvangin, Ram-âr thai chhiat tawh lohna turin mau tlawnin buhpawl kan delh bet ta mai a ni. Hetiang deuh hian, thilsiam dangte nena nunho dan kan thiam a tul hle. Tun laiah sava silai tha pui pui leh accessories tha pui pui a lo chhuak zel a. Ngaihtuahna nei mang lo, mi â pui pui, silai nena sava pêl khut khut thin kan tam viau reng chuan, a dik dawn miah lo. Sawrkar pawh hian heng silai khuahkhirh leh regulate kawngah chak takin hma la vat se a duhawm hle.
3. Thingthupui rah a hmin tan mêk a. Sumdawng thenkhat chuan, a kunga a rah puakkeh hmin nghâk hman lovin, a rah an lova, an pho hmin leh thin. Chutianga thingthupui chi an kheh chu man to takin an zuar leh thin a. Heng hi lei loh a him. tiak lovin a tawih duh êm êm. Thingthupui hrim hrim hi zo -bawm deuh a ni a. Hei vang hian phaiah a awm ve vak lova. Chutih laiin kuhva huan leh ser huana chinpawlh atân a tha êm êm. Zungpui thûk taka nei chi a nih vangin, lei chhungril thûk taka nutrient awm a zuk la thei a. Tin, hnah hlai leh kumtluana hnah hring pu reng a nih vang hian, huan leilung tuam dam nân a tha êm êm. A hnah a hlai avangin kuhva hnah kâra ni eng rawn lût tlêm tê pawh, a duhkhawp dawng turin potential a nei a. A kung hi (lawh than chu) a sâng vak thei lova, thlai lian dang a dîp lutuk lo bawk nên. Thlai kumhlun dang nêna chinpawlh chi tak a ni âwm e. Tin, thlai lian kumhlun karah hian tualto thingte zuah a lukhawng êm êm bawk. Mahsela, thlaite thlithlawr thei lo turin tualto thingte chu tuk-buk thin tur a ni thung. A chhan chu, tualto thingte hian, thlai tâna lei hrik tangkai (beneficial organisms) tam tak an awmtir thei thin. Heng hrikte hi kan thlaite chaw ngaihtuahsaktu leh vengtu an ni thin. Anni an awm that chuan, thlai natna leh eichhetu rannung pawh an nghel nêp ngei ngei thin a ni. Mahni hmasial taka huan kan enkawl a, sum thawkchhuak thei kan thlaite chauh kan chin hian, khawvel boruak lo inthlâk zelah kan thlaite an him lo êm êm zâwk a ni. Hei bâkah hian, thlai kumhlun hmunah chuan legume kan tihte kha chin tel a tha êm êm a ni. Betê hi a chhelin, hnim a dîp chak êm êm a. Kuhva/Serthlum huanah a chin chi êm êm. Bete ni kher lo, thlai zam lo chi, boruaka nitrogen leilunga khawlkhawm thei (legume) thlai tam tak an la awm a. Chungte zawn chhuah leh hman tangkai hi huan kumhlun siamtute tihmâkmawh a ni chho mek a. Tlo leh daihrei zawka leilung leh thlai kan enkawl thiam theih nân ngaihven leh inzir peih kan ngai êm êm e – Mizo farmer-te hi.