RK Dawla
Mb 9366095658
-- Advertisement --
1. April thla tawp lamah vanneihthlak takin ruahtui kan dawng tha mial a. Tuihna a tipung hlek tham a. Kangvar leh huan kumhlun neite tân chuan thil lawmawm tak a ni. Chutih laiin mithiamte chhût danin, kumin hian Neutral El Nino conditions beisei niin, keini NE India lamah chuan ruahtui tlêm kum ni tura rin lâwk a ni a. Favang thlai natna puang thin pawh a zia-awm deuh a beisei theih âwm e. India hmar lamah thung chuan ruahtui tam (above normal rainfall) beisei a ni thung. Khawvel sik leh sa lo danglam zel hi a takin kum tin kan hmachhawn chho zel dawn a. Hemi kawngah hian Mizo farmer-te pawh kan khawhawi kan tih-zau zel a tul hle âwm e.
2. Covid hrilên hnu hian farming lamah kan harh thar viau a. Tihrawl innêk che vel vanga thlan chhuak thatzia mi nawlpuiin kan var-pawh nasa a. Hahdam taka ei tihtui ngawt hian nun nawmna min thlen tak tak lova, health complications a tam mai mai tih hrethiam turin kan lo changkang chho ta a. Thil lawmawm tak a ni. Mi nawlpuiin farming kan thlir dan pawh a inthlâk mêk a, sawrkar pawhin kuthnathawh lam a hawi ta deuh niin a lang bawk a. Tin, ruihhlo tawlh vanga inla liante hmusit ngam khawpin kan lo huaisen tan ta a, mipui chan-ai eiru nia kan hriatte laka kan thîkthu a chhiat hle hunah phei chuan, ram nuam tak kan siam chho ngei ang. Ngaihsan tur dik, entawn mai theih tur, thangtharte hian kan mamawh a, chutiang mi chu field hrang hrangah an lo chhuak mêk zel a. A then chu zaithiam leh sipai te, politician leh farmer-te ni mah sela, kan vaia kan luankhawmna chu Mizoram tân vek a ni a. Kan ram, kan hnam tân kan hnathawhna theuh-ah rim tak leh fel taka theihtawp kan chhuah a pawimawh êm êm e.
3. Khawi lai hmunah pawh, eng operation pawh kalpui dawn ila, kan operation kalpuina tur ram nihphung awmsa hriatchian kha a pawimawh hmasa ber a. Chutiang ni lova, theihna leh neih chhuanga tawngpawng basa ngam ngawt fuh lohzia chu America hian Vietnam War-ah te, Afghanistan-ah te a tilang chiang viau âwm e. Chutiang bawkin, kan Mizoram chhungah hian farming operation engpawh kan kalpui dawn rêng rêngin, kan ram leilung nihphung, sik leh sa leh mipuite sûkthlêk hi kan hriatthiam hmasak a tul hle. Hei hi project tha pui pui hlamzuih/daih rei loh chhan bulpui pakhat a ni fo. Kan ram zîm tê-ah hian, kan awhzawng ni lovin, kan mamawh thlai kan chin thiam a hlu hle bawk a. Thil kan intihhmuh chak lutuk hi a hnam anga kan buaina a ni fo mai. Hei hi kan ngaihtuah chian a tul hle. Vawkvulh kan intihhmuh lutuk a, ASF kan tawrh phah reng a. Dragonfruit kan uar leh chiam a, a zo a phaiin tlang tin mual tinah kan ching luih luih a, market-ah kan buai dêr! Sawhthing kan ti leh luih luih a, market chhiat kum a lo ni lehzel nen, kan phun leh luih luih a. Sawrkar hian a vei êm a, kan la zia hrâm hrâm zawk a. Tuithil ram, Ngopa-ah thlasik Dawnfawh lian an han ching hlawhtling a, khaw tin maiah kan interest êm êm a, Concerned dept thlengin project kan han siam ngawt a. Kan ei sêng lova, ramdang atangin a rawn lût reng bawk nên, kan buai ru kum tin a ni lo’m ni? Engatinge potential awm mang lohna hmunah pawh, mi tih ang tih ve phêt kan tum tlat zel mai le aw… Farmer bengvar deuh chuan, mi chin loh ang an dap hrâm hrâm a, mi thar loh hun laia thar an tum hrâm hrâm thin zawk. Kan thlai chin intihhmuhte hi a tam tak tak chuan, kan la buai zel chu a nih hi. Ramdanga thawn chhuak tak tak turin kan potential hian a la pha rih bawk si lo. Sustainable mindset nena farming kan hmachhawn a hun tawh takzet a ni. A khaw nâwta Dawnfawh, Tomato, etc chin hut hut hi a la hun chiah lo. Processing & marketing potential tha a awm a nih loh chuan. Mi tam zawkin thlai chi 1 an uar viau a nih chuan, chûngho mamawh thlai chi dang chu lo chin thên mai tur ania. Farmer-te hian District capital leh khaw lian deuh kan tlawh hian, mamawh lam tur ngawt lo deuhin, an bazar thlai zawrhte rate & conditions zirchiang tel thin ila, idea tam tak kan neih phah ang. India hmarchhak kilah, acre 2/1 vela zauah ramdanga hlu tak thlai kan lo chin ve veu veu hian, eng hlawkna leh tlona mah kan char chhuak tak tak lo tih hre tur hian upat viau a ngai lo asin mawle…Chuvangin, i ngaihtuah chiang teh ang u khai!