RK Dawla
Mb 9366095658
-- Advertisement --
1. Mizote hian Chanchin tha avângin hma kan sâwn nasa êm êm. Kan hawiher, chêtphung leh khawsak dan hi kum tam a liam hma-in a inthlâk zung zung a. Chutih laia danglam thei mang miah lo chu kan lo neih dan, farming system hi a ni âwm e. Huan ngelnghet enkawl a, kum tin lo vât lo awm nual mah ila, a tam zawk ngial chuan, Chhurbura hun lai ata tawha kan lo chin tawh, kum tin lo vâtin ram kan la hâl duai duai a. Pu Vanneihtluanga tawngkam takin, “Khawvel map en ila, chutiang tih ching chu mawl tak vek” kan ni. Chuvang chuan, farming system pawh, a tunlai ber ber kan ban phâk hi a pawimawh êm êm a ni. Tunlaia khawvelin a uar thar êm êm, tlo leh daihrei taka leilung leh thlai enkawl lam kumin chho chu kan zir chho leh dawn a, he thuziak chhiartu zawng zawngten hmasawn nân kan hman theuh kan beisei. Kan ram hi a zîm hle a, mihring pawh kan tlêm êm êm, India ram state dangte ngaihtuah chuan. Chutih laia engkim maia vaiho châwm kan ni fai vek leh, state anga tharchhuah mumal sawi tur kan pachhe êm êm hi, harh a hun a, chêt a hun takzet a ni.
2. Issue hmasaah khan tlo leh daihrei tura thlai chi thlan fimkhur leh uluk a ngaih thu kan zirho tawh a. Tun tumah chuan leilung buatsaih leh leilung enkawl lam kan thlirho thung ang a. Kan hre theuh a, Mizoram chu hmun tam zawk awihpang, hun bi neia ruahtui dawng bawhawk tak thin kan ni a. Chawhrualin thla 6 chhung ruahsur, thla 6 chhung khaw ro tiin kan sawi thei ang. Tin, kan ruahtui dawn dan hi khaw tha vang vang a, sur deuh thut a nih vangin kan lei chunglang hâng a kalral nasa êm êm a. Mi tam ber chuan, lei chunglang kalral laka invenna mumal kan nei mang miah lo lehnghal a. Hei vang hian kan lei thatna tam tak a kum têlin a kalral a, hmunhma kan enkawl rei poh leh lei a chhia-in a da ting mai thin. Chu chu kan thlaiah a rawn lang chhuak âwl lo thin. Thlai chinna tur huan kumhlun kan siam dawn rêng rênga pawimawh hmasa ber chu lei kalral tur vên kha a ni a. Hemi atân hian kan remchan ang ang – terrace te, contour trench (huan vangtan zawnga khur laih thluah) te, huan vangtan zawnga grass leh legume kumhlun bit taka chin te kan practice a tul hle. Tuihâwk force na tak hi kan check loh chuan, thlaruk chhunga malsawmna kan dawn ruahtui hi anchhia-ah a chang thei a ni. Tin, thlai kumhlun hmun phei chu fur laia leilung hnim khuhtir a pawimawh hle a, hei hian ruahtuiin lei chunglang a sawisa tur a vêng tha hle. Fai lutuka thlai kumhlun hmun sàm emaw hlo tûr hmanga kahte hian leilung a ti tlo lo êm êm a. Kan ram ang, awih pang, lei hâng tlêm-sa leh kalral samah hi chuan hnim hi thiana siam thiam a pawimawh êm êm. Thlai kumhlun bulhnaiah, hnim an nghal lutuk tur vên leh hnim dang pawh zuah chan hleka sàm emaw nem thlûk kha kan ram sik leh sa leh leilung nên a inrem êm êm. Mihringin kal vel nuam kan tih hi thlai kumhlunte tam berte hian nuam an ti ve hauh lova. Chuvangin, vawk kan vulh chuan vawk ngaihtuahna anga kan ngaihtuah a tul a, thlai kan chin pawhin thlai angah inchan thiam a pawimawh. Tin, pawn lam atanga kan thlaite châwm tura leitha kan ngaihtuah tluk bawk hian leilunga awm tawhsa thlai chawte kalral tur vên hi kan tlo theihna tur point lian tak a ni kumkhua ang.
3. Terrace laih hi leilung enkawl a nuam a. Mahsela, lei chhungril sen, subsoil kan phawrhchhuah thin avangin laih thiam a ngai hle a. Lei chunglang tibo lo zawnga terrace laih pawh kan khawih hrâm hrâm a tul thin. A chhan chu lei chhungril phawrhchhuah siamtha leh tur chuan a hautakin hun a duh rei êm êm a, thangkhat lian a ngai daih ta thin. Mizoram awihpangah hi chuan, contour trench laih bâkah huan vangtan zawngin contour footpath laih thluah a tha. He footpath inkar awih laiah thlai chingin, enkawl turin mihring kha hmun remah (contour footpath-ah) kan kal thei chiah a, chêt a sam bik êm êm. Leitha pêk, damdawi kah leh a rah seng chenin a awlsam bik êm êm a ni. Engpawhnise, huan hlutna chu a zauh lamah ni lovin, a tharchhuah rei theih lamah kan teh zawk fo tur a ni e.