RK Dawla
Mb 9366095658
-- Advertisement --
1. Fur kan thleng chhova. Thil tiak phun hunlai a ni a. Thlai tiak chi hrang hrang an rawn zuar leh chho mêk a. Mak ve deuh chu, Mizoram leilung hi chuti lua-a a that loh tehreng nên hian, thlai chi hrang hrang kan lâkluhte hian an ngeih tlangpui mai a. Ramdang atang hian thlai chi/tiak kan chawlût nasa viau tawh a, tha thei lo thlawt hi chu a tam vak lo hle. A chinna tur leilung buatsaih leh enkawl zui kawngah kan thiam lutuk lo nâ a, kan enkawl loh ang ai hian kan thlai/thei lâkluhte hi an zia tlangpui. Mi ramte tihdan angin, uluk zawkin thiamna leh theihna sâng zawk nên enkawl phei ila chuan, kan ram hi khawvel horticulture hmunpui ni thei khawpa potential nei tha niin a lang.
2. Mizoram hmun tam zawk hi awihpang a ni a. Hmun zawl leh rem kan neihte hi chu a ram pum ngaihtuah chuan a tam tham lo êm êm. Hei vang hian a tlangpuia Mizoram topography sawi nân Tlangram tia sawi mai hi a sual tampui lo viau. Tin, kan tlâng pang rau rau pawh awih tha pangngai tak an ni hlawm a, hmun tlêm tê tih loh chu. Heng zawng zawng ngaihtuah hian, Farming khawvela Mizoram larna leh dinchhuahna tur chu Horticulture hi a ni lo thei lova. Tin, a mi chengte hi thei tiak phun leh enkawl kawngah kan tui tlangpui bawk. Hralh thama chin tum lo pawhin – naupang lawm atân/chhungkaw ei atân/a buk tihmawi atân etc etc kan phun peih tlangpui vek mai a. Mizo rilru leh kan ram bik leilung kan en chuan, horticulture hi kan pianken a ni a. Tunlai thiamna leh hmasawnna tur riruang duan fel zawk nên thei lam chin uar kan mamawh khawp mai.
3. Kan ram awihtlan vang hian ruahtui a inthlihul zung zung a. Ram lum tia chhâl theih kan nih avangin thlaiin an ngeih tâwk lum leh hnâwng kan dawng tha a. Kan ram a rem lo, mechanised a harsa, kawngpui a tha lo kan ti fo tak nâ a, mi rama an harsatna tam tak hi kan remchanna a ni ve thung bawk a. Heng kan remchannate hi hmang thiam a, kan harsatna pawh sukiang zawk tur kan nihna hi a hnam ang pawhin kan inpawm thiam a tul hle. Ruihlo leh sualna chi hrang hrang tam êm êmna chhan pakhat pawh hi kan hman lutuk vâng a ni thin. ‘Awm âwl chu Setana thlawhhma’ kan tih thin kha, tunah a takin kan ramin a tawng chho mêk niin a lang. Lo leh huan enkawl hi mi lehkhathiam lo hnaah kan hnam hian a ngai rei lutuk a. Taksa leh rilru hriselna tura kuthnathawh kan ngaihsàn loh tâkah chuan kan hman ta viau mai a. NGO leh Kohhran lamah activities nei lêmlo mihring chu kan hman viau ania. Tin, Kohhran leh NGO hrang hranga inhmangte pawh, an activities kha eizawnna chi ni hek lo, chhungkaw economy a chawikâng si lova, suit nalh tak tak nên kan hnam hi a rethei ta êm êm mai a nih hi.
4. Hmathlir thui tak neia farming luhchilh hi a tul takzet ta. Chuta tân chuan kan ram leilung kensa leh kan rilru milsa horticulture hi kan ram hmun tamzawkah beihpui kan thlâk a tul e. Kuthnathawh kan màusàm rei luat vangin kut tling lova hausak kan idol mêk a. A dik tak chuan, eiru leh damdawi tawlha hausate hi a nawlpui chuan kan hmusit, a mimal ang chuan kan awt tho! An thiltih kan awt a ni lo, an hausakna kha kan awt a ni! Awt lo tura inzirtir chi a ni lo, kan hlawhchham dawn tho tho! He awhna hi beiseina tha-ah kan chantir a, chu beisei tha chuan a taka kan taksa a tihchêt kan ngai mai zawk a ni.