CLIMATE SMART, SUSTAINABLE FARMING – 26

RK Dawla
Mb 9366095658

1. July thla niin, ruah bawhawk a reh tan a. Sur thut, bang leh thut bâkah phî seng seng ang chi khan kan dinhmun mêk. Baw tlawrh tlawrh ai chuan thlaiin an ngeihin, leilung a khawih chhe lo deuh a. Tin, Mizoram hmun hrang hrangah sawrkarin sawhthing chingtute hnêna price support a pêk tur kha, farmer-te account-ah a thleng har hlei viau mai a. Mizoram district lian ber Lunglei district-ah phei chuan support price hi satelin a phur ta emaw tih mai turin a thleng muangthar êm êm a. Hetiang system fello hi thuneituten rang takin enfiahin chingfel sela a tha khawp mai. Hun kha leh chen kha sawrkarin farmer-te a ngaihsak TAK TAK ngai lova. Tunah an thawhrim rah an têl dawn chauh a, an thlai hralhna man a thang rei lutuk hi a runawm hle. 
2. Tun sawrkar tharah hian Agri/Horti Link road laih kan uar thar ang reng a. Tlo deuh zawk tura check dam leh tuiluanna siam tel hi a kawng zawhtute hian hnatlâng ang pawha kan tih ve turah ngaih a tha khawp bawk. Engkimah sawrkar phût vek hi a dik hauh lova, tih ve tur (community contribution) awmze nei tak kan duan ve thiam a tul hle bawk. Tin, Mizoram sawrkar enkawl chin kawngpui hi, chhim lamah a chhe êm êm reng hi MAK a tling ta bawk. Project lian tham deuh kan nghâk a nih pawhin, chutih chhunga kawng chhe zual siam chhim lamah a muang êm êm reng thin hi engatinge ni dawn ni? Kawng enkawl tura sawrkarin cheng tam taka a rawih kan Engineer-te hi, officer lian emaw inti-a an enkawl kawngpuiah hmuh tur an tam lo êm êm system hi a dik lo hle. Paper work (drawings & estimation) tihfel hi kawng chanve chauh a la ni a, a chanve dang chu a tak taka thawh (work execution) kha a ni. 
3. Mizoramah hian sawrkar hna kan ngaisâng lutuk hi sim vat kan ngai bawk. Kan ngaihsàn luat avangin sawrkar hnathawkte an induh fova, kan phunnawi leh hle si thin. Zirna, inkalpawhna leh hriselna hi khawi ramah pawh hmasawnna lungphûm a ni thin a. Pathum zinga pakhat chauh pawh hi a that loh chuan, a pawi bulthut tho thova, hmasawnna ngelnghet leh rualkhai a thleng tak tak thei lo thin. Zirlaite pawh, sports leh arts eng engemaw bâkah social work lama kan hrual a hun tawh hle. Sanitation lama heti taka kan hniam chhan pawh hi naupangte zirtirnaah helam hawi kan zirtir tam tâwk loh vang a ni ngei ang. Building chhunga khung ngawt ngawt lo deuhvin, zirlaite pawh khawilai kawngpui kamah emaw tawihthei lo bawlhhlawh thianfai tur te, khawi lai tuihnâ awmna kawr thianfai turte-in a taka kan teichhuahpui a hun tawh hle. Middle school, High School & Secondary bâkah College naupang thleng hian social service neihtirna tur chance kan ngah êm êm. An lehkhazir bâkah sports kan uarpui a, picnic kan uarpui viau bawk. Heng hi a tha lo a ni lova, lehkha zir, sport leh picnic chauh hi chu an hma lam hringnun atân a tâwk zo lo. An syllabus-ah hian hlo thlawh te, buh tuh te, huan sàm leh thei enkawl (pruning & manuring) te tel thei sela, chûngho chu passed ngei ngei ngaiin siam ila, ‘hnam thatchhia leh sum duh uchuak’ tih tawngkam hi a bo chiah lo a nih pawhin, a tlêm zawk hle ngei ang. Tuna kan kaldan hi chuan taihmâk kan inzirtir tak tak lo, hnathawh pumpelh nân sikula kal leh hna chhe tê tê hmuh kan inzirtir lek chauh a ni. Khawvel huapa farmer hlawhtling ni thei turin potential kan nei tha, mahsela chutiang tur chuan mihring tha kan chher a ngai. Tunhma deuh, sâp hovin zirna min kaihhruai lai leh sapho kaihhruai zirtirtute hnuaiah kha chuan, a tak takin hna thawh an zir a. Mi hlawhtling kan ngahin Central service-ah pawh kan lût hnem. Tunah chuan political appointment hmanga zirtirtu ni âwm tak tak kan ngah tâk hnu hian, kan zirlaite an no bâkah an quality loh êm hi. Zirna leh kuthnathawh kan kalkawptir thiam lova, mi awm âwl leh thatchhia, rûk rûk hmang leh ruihhlo bawiha tâng kan ngah tâk êm hi! A hnam angin kuthnathawh-ah kan harh a ngai e.