CM dawr haw MVA hruaitute an hlim! Icon-in handbook tlangzarh dawn

CM dawr haw MVA hruaitute an hlim!
Icon-in handbook tlangzarh dawn
Tunkar Thawhlehni khan Mizoram Volleyball Association (MVA) hruaitute chuan a office-ah chief minister Lalduhoma hmuin, an harsatna hrang hrang an thlen zingah Aizawla volleyball-in an puala indoor stadium hranpa an la neih loh avanga harsatna an tawhte leh hmasawnna daltu a nih thu an hrilh.
Chief minister hian volleyball indoor stadium sak a ngaihpawimawh thu lo hrilhin, indoor stadium atana estimate siama sawrkara thehlut turin a rawn a, fund awm theih dan ngaihtuahpuia stadium sak a nih ngei theihna’na tan lakpui a tum thu amah dawrtute a lo tiam.
MVA hruaitute chuan CM hnenah hian international volleyball coach an neih theihna’na tanpui an ngen nghal a, kumin July ni 26-a Maldives khawpui Male-a International Volleyball Federation-in Coach Level I Course a buatsaih turah Lalduhoma hian mipakhat kalna senso tur a lo sponsor nghal a, CM zarah Mizote’n international volleyball coach kan neih ngei a beiseiawm a, chief minister chungah MVA hruaitute’n lawmthu an sawi.
Vawiin hian Pro Volleyball League 2025 Hanbook chu Hawla Indoor Stadium Conference Hall-ah Youth Icon 2024 Lalsangliana (Taitea) chuan a tlangzarh dawn a.
MVA chuan Pro Volleyball League Handbook tlangzarh hi a ngai urhsun hle thin a, Pro Volleyball League khelh chhung zawnga game inkaihhruaina bakah dan leh hrai ziahna a nih avangin urhsun takin a tlangzarh thin a; hun hmasa lamah pawh mi lar leh hruaitu lawk tak takte’n an lo tlangzarh tawh thin a ni.