CM-in Pu Hawla hming a lam ri lo kha a mak hle – Liansuama

On Jul 2, 2024 11 0

Kumin Remna Ni puala hun hmanah chief minister-in remna atana hma latu zingah Pu Lal Thanhawla hming a lam ri miah lo thei chu mak a tih thu Former Legislators Association of Mizoram (FLAM) president Liansuama chuan a sawi.
Thawhtannia Congress Bhavan-ah Remna Ni champha vawi 38-na an lawmnaah FLAM president hian thu a sawi a. Remna chu kohhran leh Mizo mipui tawngtaina rah a ni a. Remna a thlen theih nan kohhran, YMA leh MZP ten hma an la vek a. Khatih lai khan chief minister Pu Lal Thanhawla, amah (Liansuama), Pu Rokamlova leh Pu Hiphei ten minister nihna an kian a. Chu chu inremna atana thil pawimawh, sawi hmaih theih loh a ni, tiin, “Remna chungchang sawi chuan Pu Lal Thanhawla hming lam loh theih loh a ni. Hmannia Remna Ni hmannaah khan chief minister-in khatih laia chief minister Pu Lal Thanhawla hming a lam ri lo kha a mak hle,” a ti.
Rambuai namen lo a thlen chhan chu politics buaina a ni a, chu buaina chu chingfel a, remna a awm theihna turin Congress party chu kum 1968-ah Mizorama din a ni a. District Council leh UT laiin Mizo Union, Congress leh PC ten rorelna an chang a. Remna a thlen theih nan hma an la vek a. Remna a thleng mai thei loa, 1984 inthlan dawnah Congress-in inthlan campaign-ah, an chak a nih chuan remna leh muanna a awm theih nan second khat pawh inngaihtuah buai loin lalthutthleng ken an intiam a, inthlanah pawh an chak phah ta niin Liansuama hian a sawi.
“Kum 1986-a MLA term khat pawh tlin hmaa minister leh MLA nihna kalsan kha thil har tak a ni. Tuna CM hian a ministry re-shuffle dawn se, a CM nihna hi Pu Sapdanga hnenah hlan dawn se a theih ka ring lo. Poilitic-ah hian Thangchhuah a awm ngai a nih chuan Pu Lal Thanhawla hian thang a chhuah ngei ang. Remna turin lalthutthleng a kian lo, a tawlh hrut chauh a ni, tihte hi thudik lo a ni,” a ti.
Pu Hawla’n CM nihna a ken dawn khan central lama an hotuten mak an ti a. Inremna atana lalthutthleng ken chu inpekna vawrtawp atang lo chuan a theih loh tiin, hetih hunlaia Congress minister Liansuama hian a sawi a ni.