CM-in university convocation hmanpuiCoimbatore Mizo Welfare-in an kawm

CM-in university convocation hmanpui
Coimbatore Mizo Welfare-in an kawm
Karunya Institutes of Technology & Sciences (Deemed to be University), Coimbatore Tamil Nadu chuan Inrinni khan an campus-ah Convocation vawi 31-na an hmang a. Mizoram chief minister Lalduhoma’n hmanpuiin honorary doctorate degree an lo hlan.
Convocation vawi 31-naa degree dawng thar zawng zawng a lawmpui tih chief minister hian a sawi a. Honorary doctorate degree an pek chu an rawng a bawlsak mek Mizoram, ziak leh chhiar thiam vekte chenna (fully literate state) ram mipui aiawhin dawn a titlu a. Zirnain hmasawnna leh changkanna a thlen zel a ni tih lantirnaah a ngai tih a sawi a ni.
India rama zirna in tha tam tak chu Kristian-te din leh enkawl an ni, tiin, “Zirna, hriselna, hnuchham enkawl leh khawtlang rawngbawlna kawng dangah pawh ram pum huapa mipui awm zat atanga tehin tlem hle mah ila, ringtute hian kan thawhhlawk thin. Karunya University pawh hi chutiang rilru pu chunga din leh kalpui a ni a. India chhim lama university tha leh changtlung pawl tak a ni chho ta hial a ni,” Lalduhoma hian a ti.
Kum 1986-a he University dintu, evangilist leh reformer Dr DGS Dhinakaran ngaihsanawm a tih thu sawini, tun thlenga tha taka enkawl zui zeltute chungah lawmthu a sawi tih a sawi a ni.
Convocation inkhawmah hian vice chancellor Dr G Prince Arulraj chuan kalkhawmte lawmna a sawi a. Pro vice chancellor Prof Dr. R. Elijah chuan chief minister Lalduhoma chanchin sawiin, chancellor Dr Paul Dhinakaran chuan zirlai hlawhtlingte hnenah medal leh certificate a hlan a ni.
Chief minister hi Tamil Nadu Mizo Welfare Association chuan a thlenna Residency Towers Hotel-ah an kawm a. An awmna leh hnathawhnaah Zo nun zemawi chhawmnung a, Pathian tih tlata awm turin a ngen a. An lo dawnsawn dan avangin lawmthu a hrilh.
Coimbatore-ah hian Mizo hnathawk leh zirlai 85 vel an awm a. Chief minister thlenna hotel-ah pawh hian Mizo thalai 20 thawk mek an awm a ni.