CM tur zuar ngam ve se – Dr Kenneth Chawngliana

CM tur zuar ngam ve se
– Dr Kenneth Chawngliana
Political party dangte chuan sawrkar ve an duh a nih chuan mipui tan an policy leh chief minister turte zuar ngam ve turin a beisei tih ZPM hruaitu Dr Kenneth Chawngliana chuan a sawi.
ZPM office-a inkhawmah Mizoram State Planning Board vice chairman Dr Kenneth Chawngliana chuan, Mizoram kaihruai tawhtute zir loh avangin hmana kan neih tawh tur kan la nei thei loa, tunah Pu Lalduhoma kaihhruaiin bul tan thar chauh ang kan ni tih a sawi.
ZPM sawrkarin kawng dik a zawh mek a, tuna hma an lak chin chauh atanga chhut pawhin, mipuiin sawrkar tha a nih zia an hre mek tih a sawi.
“Kum hnih chhung hian eiru ve duh nise eiruk tur a tam lutuk a, heti chung hian tumah hminghliau awm loa, kan minister-te kut a fai thiau hi an fakawm. Kalphung thar mipui sawrkar hi Mizoram tan a thlamuanthlak a, opposition party-te hian sawrkar ve an duh a nih chuan mipui tan policy zuarin chief minister tur pawh zuar ngam ve se,” a ti.
India ram state 28 leh UT 8-ah Congress-in state 3 chauhah sawrkarna changin, sawrkar laipuia an chet chhiat chuan state lamah nasa takin an tlahniam zel thin tih ZPM hruaitu hian a sawi. Tunah phei chuan hmarchhakah Congress sawrkarna a awm tawh loa, Mizoramah pawh inthlanpui hnuhnung berah seat khat chauh an chang tih a sawi a ni.
Mizorama ZPM sawrkar hnuaiah Prime minister Narendra Modi-a’n India tha tak leh chak taka a kaihruai ang maiin, Pu Lalduhoma kaihhruaiin kum hnih chhung lekin hmel thar kan hmu a, hetiang zela kal chuan India ram state danga party thenkhat term tam tak an sawrkar angin ZPM pawhin sawrkarna a chelh ngei a ring tih a sawi bawk.