CM Zorama’n banna thehlut “Sawrkar lai nin leh Covid vang”

MNF party-in sawrkarna an siam zui theih dawn loh avangin chief minister Zoramthanga chuan Thawhtanni tlai khan Raj Bhavan-ah kalin Mizoram larsap Dr Hari Babu Khambampati hnenah chief minister atanga banna a thehlut.
Chief minister banna thehluh hi larsap hian a pawm nghal thu a sawi loa, tuna sawrkar lai (MNF) term tawp hun hi December 15 thleng a nih avangin, banna thehlut mah se, chief minister nihna erawh a la chelh zui rih tura ngaih a ni.
Banna a thehluh zawha thuthar thehdarhtuten an kawmnaah MNF president ni bawk Zoramthanga chuan a sawrkar tlak chhan lian ber chu sawrkar lai ninna leh Covid leng vang niin a sawi.
“Covid khan kan economy leh thildang zawng zawng min tichhia in harsatna namen loah kan lut a, chu chu opposition party-in advantage-a la in an fel loh vang min ti a, chu chu mipuiah kan inhrilhfiah seng tawh si loa, chuvangin he harsatna lian lutuk min pek kara kan sawrkarah hian sawrkar lai duhkhawp tawk lohna – anti incumbency a nasa a ni,” a ti.
Inthlan hnuhnung bera MLA 27 nei, tuna 10 chauh neih chu an inring bik loa, boruak a kal that chuan sawrkarna siam theih pawh an inring tih a sawi a. Chutihlaiin mi rilru ah, a bikin district headquarters leh khawpuiah anti incumbency a awm a, sawrkar dinglai thlak hrim hrim, MNF ni lo Congress ni lo tuihala tuihal huam huamna an hneh lo a ni ber tih a sawi. “Kan bial, Aizawl khawpui, Lunglei leh khawpui dang pawh he boruak hian a tuam vek a, chutah chuan tumah ding zo kan awm lo. Sawrkar thlak duhna a awm a ni,” a ti.
A political career-in nghawng a neih leh neih loh thu zawhna chhangin Zoramthanga chuan, inthlanah an tla tam tawh a, MNF ah nghawng a nei ngai chuang loa, 1986 atangin vawi tam inthlanah kan tling a, kan tla a, a dawtah chuan a aia chakin kan chhuak fo thin a ni. MNF movement, MNF party kaldanah leh keimahah Pathian zara damtea kan awm chuan engmah nghawng a neih ka ring lo.
NDA a tel zawm zel leh zel loh chungchanga zawhnaah, an party thuthlukna a ni dawn tih a sawi a. NDA dintu zing ami ‘founding member’ a nih ve avangin, a mimal ngaihdanah erawh NDA chhuahsan tulna a hre lo tih a sawi.