Coach thar hnuaia chak nghal Radu

Coach thar hnuaia chak nghal Radu
US Open inbuatsaihna tournament hnuhnungber 2025 Cincinnati Open khelh mekah tunhnaia coach ruai thar British number one Emma Raducanu chuan Inrinni khan a trainer thar hnuaia a match hmasaberah 6-3 6-2-in Olga Danilovic a hneh.
Kum 2021-a wilcard mai ni chunga US Open title sualchhuak nawlh Briton hian coach a rawih kual viau hnuah tunhnai khan Rafael Nadal-a coach hlui Francis Roig chu a nghetin a senglut a; coach thar hnuaiah hian inrintawkna sang tak nen Cincinnati Open a hmachhawn a, first round-a British number three Katie Boulter hnehtu Serbian number one Danilovic lakah Radu hian phuba a la zui ta a ni.
New York khawpuia 2021 champion hi first round a ‘bye’ a, second round atanga bul tanin, Ohio lamah harsatna lian tawk loin third round a lut zui ta mai a ni.
Kum 22-a upa Raducanu hi tunah world number 39-na niin, second round-a a paltlang Danilovic ai khan pen liin a sang a, Spaniard coach hnuaiah hnehnain bul a tan ta phawt a ni.
Raducanu tum leh tur world number one Aryna Sabalenka hi tunhnaia chawlh a hmanna hmun atanga fresh veng vawnga kir hlim niin, thla hmasa mai Wimbledon-ah khan an lo intawng tawh a, set hnih inbei tawk takah Balarusian a chak a, tuntum Cincinnati-ah hian Spaniard coach thar hnuaiah Briton hian phuba lak a chak khawpin a rinawm!
Sabalenka tan tun hi Wimbledon semi-final pakhat zawka 7-5 6-1-a Czech Marketa Vondrousova a hneh loh hnua inelna a hmachhawn leh vawi khatna tur chiah niin, US Open warm-up tournament dangah inlan loin nipui chawlh a hmang bo daih a, ni sen sa hnuaia a inpho hang lai thlalak pawh internet lamah a ‘viral’ chiam a nih kha!
Inrinni inkhel dangah Poland Wimbledon champion Iga Swiatek pawhin last 32 lut turin Russian Anastasia Potapova lakah 6-1 6-4 hnehna a chang a; Australian Open champion Madison Keys of the United States pawhin Germany player Eva Lys lakah 1-6 6-3 7-6 (7-1) hnehna a sualchhuak ve hram bawk.
Cincinnati ATP draw lamah world number one Jannik Sinner pawhin kumin Wimbledon title a lak hnua a match hmasaber khel ve bawkin, a match hmasaberah hian 6-1 6-1-in Colombia player Daniel Elahi Galan a sawp nghal.
Men’s ranking lama number four luahtu ni mek Taylor Fritz pawhin ace vawi 12 zet nei chungin a chipui American Emilio Nava lakah 6-4 6-4 hnehna a sualchhuak ve bawk.
Italian eighth seed Lorenzo Musetti chu Frenchman Benjamin Bonzi lakah a tlawm a, world number 63-na luahtu Bonzi hian 5-7 6-4 7-6 (7-4)-in Musseti hi a hnawtchhuak.
Frenchman dang 70th-ranked Arthur Rinderknech pawhin beisei loh result dang siamchhuak ve baawkin, Norway player hriat hlawh tawh 11th seed Casper Ruud lakah rin loh takin 6-7 (5-7) 6-4 6-2 hnehna a chang.
Kum khat chhunga Grand Slam tournament hnuhnungber ni tawh tur US Open hi August ni 24 -a khelh tan tur a ni.