Coast Gurad hmanrua tur lei nan inremna ziak

Coast Gurad hmanrua tur lei nan inremna ziak
Ministry of Defence (MoD) chuan Ningani khan Indian Coast Guard hman tur Software Defined Radio 149 leisakna turin Bharat Electronics Limited (BEL), Bengaluru nen inremna an ziak.
Inremnaa bungraw inleisak tur hi Rs vaibelchhe 1,220.12 hu niin Buy (Indian-IDDM) category hnuaia ziah a ni tih ministry thuchhuahah tar lan a ni.
Ministry-in thuchhuah a siamah hian ram chhunga siam chhuah ngei radio hi ram himna atan leh thil pawimawh inhrilhna atana rintlak, thawhhona tha siam thei tur leh high-speed data leh secure voice communication hmanga a tul huna hman zung zung theih tur a nih thu a tar lang.
“He thil hian Indian Coast Guard-in a mawhphurhna tha zawkin a hlentir thei ang a. Tuipuia dan leh thupek kenkawhnaah te, mi zawn leh chhanchhuahna atan te, sangha venhim nan leh tuipuia khuarel vawn himna atan an hmang thei dawn a. Heng bakah hian radio hi Indian Navy nen tangduna beihpui thlaknaah an thawhho a tiawlsam lehzual bawk ang,” an ti.
“Coast Guard-te hna thawh tiawlsamtu leh India sorkarin tuipui himna atana Blue Economy objective a neih mek tichaktu a ni dawn bawk a ni,” tiin an tar lang.
Ram chhunga mite siam chhuah ngei hman a ni tur chuan sorkar laipuiin mahni kea din, Atmanirbhar Bharat a kalpui mek pawh a tihlawhtling dawn a. India hian sipai hmanrua leh inbiakpawhna tha zawk a siam thei a, hemi atan hian hna pawh a siam belh thei dawn bawk tih ministry hian a sawi bawk.