College library-ah Mizo literature section awm se – Dr Vanlalthlana

Zirlaiten awlsam zawka Mizo literature tha an hmuh theihnan college library-ah Mizo Literature Section changtlung tak awm thei se a duh thu Higher & Technical Education minister Dr Vanlalthlana chuan a sawi.
Mizo Writers Association (MWA) in Foundation Day 2024 an lawm a hmanpuinaah minister hian, ziakmite chu Mizo history chabi kawltute an ni tih a sawi a. Thu leh hla in thil a tih theih zia, khawtlang nun leh ram inrelbawl dan thlenga a nghawng thui theih zia sawiin, thalaite kawng dik kawhhmuh a, ram siam danglam tura thalaite kaihruaitu ah ziakmite chu a sawm. Mizo ziakmite kutchhuak thu leh hla hlutna leh pawimawhna sawiin, “Heng thu leh hlate hi keini bak a hluttu tur kan awm chuang lo,” a ti.
Zirlaiten awlsam zawka Mizo literature tha an hmuh theih a, college library Mizo Literature Section changtlung tak a awm chu a ngaipawimawh tih a sawi a. Hemi atan hian Aizawl North College library-a dah turin MWA chu a tlem berah cheng sing hnih man Mizo ziakmite kutchhuak thlangkhawm turin a chah. Chhunzawm tlak a nih dawn chuan hma lak zel theih dan ruahman a nih theih thu a sawi.
MWA Foundation Day lawmnaah hian an pawl treasurer T Lalnunsiama chuan MWA dintu mi paruk – C Rokuma, Selet Thanga, JF Laldailova, James Dokhuma, RL Rina leh R Lalrawna te chanchin presentation a pe a ni.
Mizo Writers Association (MWA) hi 1977 July 23 a din a ni a, kum 47-a upa a ni tawh. A din tirh atangin Mizo tawng tih hmasawn nan leh Mizo thu leh hla tihhmasawn nan kawng hrang hrangin hma a la thin a. An hmalakna zingah – lehkhabu lehlin tha ber lawmman hlan, Mizo Proficiency Prize siam, Thu leh Hla Kutpui buatsaih leh Lehkhabu Pho Runpui neihte a tel.