College veng tan Zarkawt an sang hret!
Chanmari chungah Bethlehem VT an nui!
Icfai University Inter Veng U 23 ah Zarkawtin point 104 an nei thei a, College vengin hun tawp dawnah nawr viau mah se point 91 chiah an nei thei a – Zarkawt vengin semi final an lut.
Z for Zarkawt!
Veng mipui tawiawmna dawng tha Zarkawt leh College veng inkhelah hian raltlan tha chhawr ngai lovin, an veng fachuam ‘The Hawk’ Hnehpuian hnehna Zarkawt a chanpui – point 25 a nei a, rebound a la thei hle.
Ruatkima Zarkawtin an nei cheu a, point 23 lai ani hian a nei bawk.
Sangzela leh Ramliana ten point 10 ve ve an nei thei a, Zarkawt hian offensive leh defensive rebound an lak tam zawk hi an chungnunna laimu a ni.
Mimal ball keng rei awm lova an in pass kual zung zung leh bul an tan that Zarkawt hian an chhawr.
An head coach Dino tan freethrow an thelh hnem chunga point 100 chuang an score thei kha hahdamna tham a tling ang; amaherawhchu, siam that ngai erawh a chiang.
Tharum ngah Dina a nghet a, ani hi game inhnehtawkah a tangkai zual dawn.
He team hian Zar-kawt thler pheiah champion nomawi chawi haw thei tak maw?
He veng hi Mizo basketball iptepui banna veng an ni a, ‘it’s coming home’ tiin an tlangval tuai tir te te hian hnehna hlado chham an tuihal zia a lang a, tun dinhmuna fans nei ha berah an puan ngam e.
Coach Dawnga kaihhruai College vengin bul tan tirh phat atangin tum dang ang lo takin an talbuai kha a mak!
|ul lovah Zarkawt player lakah an foul nasa a, 1st qtr-ah an lut hlei thei lova, point 8 chiah an score thei hram khan an talbuai zia thup theih lovin a tarlang chiang hle!
An defense a pawp zui a, point 25 laia inthlauin Zarkawt an um chang te a awm hial! College veng khelh fuh loh ber um a ni chiang.
Tleipuia leh Didika ten point 28 lai an nei thei a, Pakea point 14 neih te kha hlu teh mah se – Mission veng an hneh tuma an game ang kha an khel chhuak pha tlat lo kha a pawi a ni!
An inkhel an thlir let changin rebound an la hlei thei lo kha chinfel dan an dap nawn fovang.
-- Advertisement --
1st qtr 2nd qtr
27 – 8 23 – 30
3rd qtr 4th qtr
55-16 19 – 25
Veng lian Bvt
thawm a na!
Bvt head coach Sangtea hian an hnufual deuh lai pawha fans awmze neia au reng peih an nei kha a hlut zia a hre chiang ang.
Veng lian an ni a, an bawh lamah chuan an ri huk zel. Hnuai leng Bvt hian 83 – 73 in chung leng Chanmari an bye bye…
He U 23 inelna ah hian hmingchher thar ‘rising star’ pian hun kan nghak chhuak ta – a hming chu Steven a ni.
Ani hian point 37 zet a ne hem mai, khawi lai hmunah mai pawh a kutin ball a deh rualin a hlauhawm vek.
Tokena (20 point) leh Mapuia (7 point) te an khel tha a, he team leh he veng hian an veng atanga Chanmari lam hawia an melh chhoh apiangin ‘hneh hnu leh ngam hnu’ an hmu ziah tawh ang!
Huaisen taka bul tantu Bvt in MSL club thawm na ber ni mek Chanmari hi hneh sa khelhin an khel emaw tih tur khawpin an ngam a, an chungnun zui phah!
Angheta te veng Chanmari tan zan duhawm lo a nia, he team thlir hian tawnhriat an neih that tawk lohna a lang!
Boruak siam thiam fans thahrui chhawr mah se, Freddy-an (35 point) thlawptu a nei tha tawk lo!
Stalin (16 point) leh Jason (7 point) ten an hneh tak loh Bvt aia an chungnunna freethrow kha an hmuh hmaih loh a rinawm.
Inkhel inbei tawk tak a nih chhoh lai, 52 – 58 a Chanmari in ‘hot’ taka Bvt an um laiin match official thutlukna chhia kan hmu! Chanmari player in Bvt player a tawk miah lo; mahse, foul ham a ni! Inkhel boruak a sang chho va, tum khat match official thutlukna chhia avangin boruak a inthlak thleng hlawk thei, fimkhur a tul!
1st qtr 2nd qtr
21 – 28 18 – 16
3rd qtr 4th qtr
20 – 15 14 – 24
Hoops Mania Time Out
In vengah khan kum upa lam, inkhel peih lutuk tawh lo; mahse, veng chhung thalaite huikhawma ho khawm peih val upa an awm chuan ngaisang thar rawh u.
Mi tin maiin mahni hna tul leh hlawkna tur deuh chauh kan um titih ta mai a, hetiang kara Zonunmawi tak, mi dang tana pen chhuak nun nei kan khawtlangah entawn tlak an la tam phei chuan veng vannei kan ni tihna.
Sawisel leh ral atanga lungtuma mi chetlakna lo vawm mai mai hian thanna leh that tlanna a thlen lova, kan vanglai hun tha a ral hnu pawha thalaite la kaihhruai peihna thinlung hian hmasawnna rahbi a thlen zawk – Siamtu pawhin a chhinchhiah kiau a rinawm.