Colombia-a mi 80 vel thih tawhnaah sipai lut ta
Colombia-a mi 80 vel thih tawhnaah sipai lut ta
Ruahman lawk tawk angin Colombia hmarchhak lama tun hnaia hel pawl intihbuaina chhuaka mi 80 vel thihna thlenna hmunah sipai 5,000 chu tirh thlen an ni ta.
Catatumbo region-ah hian National Liberation Army (ELN) leh Revolutionary Armed Forces of Colombia (Farc) peng pakhat intihbuaina avangin mi sang tel an tlanchhe tawh a, emergency puan mek a ni.
Sorkar hotu pakhat chuan ELN helho hi in tinah lutin an do mek pawla nena inzawmna nei nia an hriat chu an that a ni.
President Gustavo Petro chuan Thawhlehni khan sorkar chu tharum thawhna hmet mit turin ‘a hlawhchham’ tih a sawi a; mahse, he an hlawhchhamna hian nakin atan inzirna a pek thu a sawi.
Ombudsman pisa chuan tharum thawhna thleng mek avang hian mi 20,000 vel an tlanchhe tawh niin an sawi.
Tam tak chu sikul leh khelmualah an inkulh a, heng hmunte hi tlanchhiate awmna atan siam chawp a ni.
Thil chhuia chanchin thar tichhuak thin, Noticias Uno chuan sipaite hnen atanga an hriat danin pawl inhal tak pahnihte inkara buaina hi ‘November, 2024-a dollar maktaduai tam tak man cocaine thawn an chân vang’ niin a puang.
Farc peng pakhat, Frente 33 an tiha member-te chuan an elpui pawl, ELN nen inremna siamin an cocaine thar leh thawnah ‘inrawlh loh ve ve’ an remti niin an sawi bawk.
Farc hi ruihhlova sumdawnnaa inhnamhnawih lian tak an ni a, an pawl pui ber erawh chu kum 2016 khan sorkar nen inremna an ziak a; mahse, la ziak ve lo an hming pu pawl dang leh ELN hi tun thlengin pawikhawihna leh ruihhlovah an la inhnamhnawih nasa hle thung.
Cocaine an thawn chhuah a ‘bo’ hnuah hian inremna lo siam tawh pawl pahnih hi an intithiam lo zui ta a ni.
An thil thawn ‘bo’ ta nia an sawi hi eng chiah nge hriat a ni lo va, Colombian chanchinbu thenkhatte erawh chuan nikum December khan counter-narcotics agent-ten Dominican Republic-ah cocaine tonne 9.5 an man kha Catatumbo atanga chhuak niin an tar lang hlawm.
Tlangram, Colombia hmarchhaka Venezuela nena an inrinaa awm hi cocaine thar chhuah leh tawlhna hmunpui ber pakhat a ni.
A that laia hel pawla lo tel tawh, President Petro chuan tun kar khan ‘Catatumbo-a thil thleng mek chuan rawlrala chete chu mi pawikhawihna atangin ruihhloh kaihhnawih pawlah an inlet ta tih a tihchian’ thu a sawi.
ELN chu ‘mafia’ tiin a sawi bawk.
Petro-a hian Colombia-ah ‘muanna tluantling’ a awmna tura beih chu a auhla ber a ni thin a; mahse, kar hmasa khan ELN nena an indawrna chu Catatumbo-a tharum thawhna thleng avang hian kum khat pawh tling lo chhunga a vawi hnih nan a titawp.
“ELN hian muanna neih duhna an nei lo,” a ti.