Colombia-a police station tam tak beihnaah mi pali thi

Colombia-a police station tam tak beihnaah mi pali thi
Colombia chhimthlang lama police station eng emaw zat bul hnaiah hil puak leh silaia inbeihna nasa tak thlengin mi pali vel an thi niin police-in an sawi a, heng beihna hi inthuruala helho chetnaah thuneituten an puh.
Beihna hi an khawpui lian ber pathumna, Cali bakah a bul hnaia Corinto, El Bordo leh Jamundi khuaah thlengin police station leh municipal building dangte an bitum a. Car leh motorcycle bomb tihpuah a ni a, rifle kah a ni a, drone pawh thlawhtir nia an hriat thu Thawhlehni khan police hotu, Carlos Fernando Triana-a’n tual chhung radio station La FM a hrilh.
Heng beihna a thlen hma lawk hian president ni mai thei tura ngaih, Senator Miguel Uribe Turbay chu an khawpui, Bogota-a a campaign laiin thah tuma kah a ni a, a titua puh kum 15 mi pawh man nghal a ni.
Corinto-ah hian AFP-a thawk chanchinbumi pakhat chuan municipal building bul lawka car tihpuah chhiat vek ruangruh a let reng tih a sawi.
“Police officer pahnih an thi a, vantlang zinga thi pawh an awm,” tiin Triana chuan a sawi a. A hnuah police chuan civil mi pahnih vel thi an awm thu leh mi 12-in hliam an tawrh thu an sawi.
Heng beihna thlentute hi tute nge an nih chiang taka hriatna awm lo mah se sipai leh police thupuangtute chuan heng lai vela awm, FARC-EMC an nih thu an sawi a. He pawl hi kum 2016-a sorkarin inremna a siampui, Revolutionary Armed Forces of Colombia (FARC)-a tel thin, inremna duh ve lova kal hrang ta an ni.
Triana chuan beihna hi FARC kal penga an hruaitu, Mayimbu tia hriat lar, Leider Johani Noscue-a thah a nih champha kum thumna thleng tur nen a inzawma a ngaih thu a sawi.
Thawhlehnia beihna an tawh hma ni thumah khan Uribe-a thah tum a lo ni tawh bawk a, hei vang hian Colombia-ah hian mi sual rual chetna rawva tak tak a thleng hnai leh em ni tih zawhna a piang mek.
Eptu, Democratic Centre party hruaitu, Uribe-a hi Pathianni khan hlawhtling taka zai a ni a. A awmna damdawi in chuan Thawhlehni khan a dinhmun a ngai a, a la hniam rih hle tih an sawi.
Uribe-a thah tumna thleng avang hian khawpui lian tam takah mi sang tel chhuak khawmin bati an chhi a, an tawngtai a, thah tumna duh loha an lantir bawk.
An rama muanna a awm tiamtu, President Gustavo Petro-a chuan Pathianni khan eptu hruaitute an him theih nan venhimna pek belh an nih tur thu a puang.
Colombian tam tak chuan cartel-ten mi an beih leh politician lawkte an thah nasat lai, kum 1980 leh 1990 chova thil thleng ang kha a thlen nawn leh an hlau hle.
Sorkar leh FARC ten inremna an siam hnuah hel pawl tam tak chuan FARC-in an thunun thinte thununtu nih tumin pawl dang nen an inbei nasa a, Colombian sorkar hian thingtlang leh khawpuiah pawh heng mite tharum thawhna hi a hmet mit hleithei lo.
FARC-EMC leh sorkar hi inbe tawh mah se nikum khan ram leilung fate an beih nasat em avangin inremna siam lovin an inthen.