Colombian president-in US chhang, ralthuam lekah vau

Colombian President Gustavo Petro-a chuan US-in amah leh an ram tan hlauhawm a siama a tul a nih phawt chuan ‘ralthuam lek’ turin a inpeih tih a sawi.
Thawhtanni (India-a zan)-a social media-a a tar lanah leftist fighter thin, Petro-a chuanh US-in kar tawpa Venezuela-a a tih anga Colombia ram chhungah tharum a thawh chuan chhan letna a hrin chhuah ngei tur thu a tar lang a ni.
“Ralthuam khawih nawn ngai tawh lo tura inngai ka ni a; mahse, ka ram tan a nih erawh chuan ka keng leh mai ang,” a ti.
Petro-a hi ruihhlo tawlh thin do nan tia sipai chakna hmanga Colombia kaha vautu, US President Donald Trump-a sawiseltu langsar ber zinga mi a ni.
Hruaitu pahnihte hi tawngkamin an insawichhe tawn fo va, tun hnaiah Trump-a hian a ti nasa zual a, tharum thawhna pawh a thleng mai ang tih hlauhthawnna a awm mek a ni.
US president hian kar tawpa Venezuelan hruaitu, Nicolas Maduro-a a man a, hei hi dan thiam tam tak chuan dan lo niin an sawi a, a hnuah Petro-a hi ‘eng nge lo thleng chu thlir turin’ a ti zui a. Pathiannia thuthar lakhawmtuten an kawmnaah Caracas-a an tih anga Petro-a sorkar laka beihpui thlak chu ‘ka tan chuan rimawi tak’ a ni dawn tih a sawi.
“Colombia hi a na a, na takin a hruai a, cocaine duh leh US-a hralh duh a ni a, rei tak erawh a ti tawh lo vang,” tiin Trump-a hian a sawi a ni.
Colombian foreign affairs ministry chuan Trump-a hi ‘khawvel dan kalha an ram chhung thilah inrawlh lo’ turin an ti ve bawk.
Trump-a hian Petro-a hi US-a ruihhlo tawlh luh tipunluntu zinga mi a nih thu a sawi a, finfiahna tak erawh hriat a ni lo va, Petro-a pawh hian a pha a, ruihhlo donaa a sipaite chetna tihtawp tawh mah se a sorkar chuan ruihhlo siam chhuah dona kawngah hma an la nasa hle tih a sawi.
“Ka mipuite hi ka ring tawk a, hei vang hian president pawh dik lo taka tharum hmanga beitu laka veng turin ka tih ngam phah a ni,” tiin Petro-a chuan a sawi.