Commerce Minister-in Bangladesh High Commissioner hmu

Commerce and Industries Department Minister F. Rodingliana chuan thawhlehni khan Md. Mustafizur Rahman, Bangladesh High Commissioner chu Bangladesh Embassy, New Delhi-ah hmuin, Mizoram leh Bangladesh insumdawn tawnna chungchang a sawipui.
Minister hian Mizoram leh Bangladesh insumdawn tawnna tur inremna kum 2022-a ziah tawh chu infrastructure mumal buatsaih a nih loh avangin tun thlenga insumdawn tawnna mumal zawk a la kalpui theih loh thu a hrilh a. Khawmual leh lui chunga inkalpawhna tha chu pawimawh hmasa a tih thu High Commissioner hi hrilhin, Mizoram lam chuan tun sorkar tharah inkalpawhna kawng siam tur hian hma an lak mek thu a sawi a. Bangladesh lam pawhin he ruahmanna milpuia hma an lak ve a duh thu Md Mustafizur Rahman hnenah hian a thlen a ni.
Bangladesh High Commissioner hian Minister thusawi hi a tawmpui thu sawiin, Mizoram leh Bangladesh insumdawn tawnna tura ruahmanna awmsate tihlawhtling turin Central Sorkar-a Ministry of External Affairs lam an pawimawh thu sawiin, nasa lehzuala nawr chet tlan a pawimawh thu Minister hi a lo hrilh a. Mizoram thlai tharchhuah zingah Sawhthing leh Aieng te chu Bangladesh-ah mamawhna a sang hle tih a sawi bawk.
Mizoram leh Bangladesh inkalpawhna tur lai chu hmun chhengchhia leh remlo lai a nih thin avangin tunhmain hmalak a har thin a, technology leh finna lo thang zelah tunah chuan thil harsa a awm tawh lo a, tihpuitlin thuai a beisei thu sawiin a theih anga Bangladesh lamah pawh hma a lo lak tur thu Minister hi a lo hrilh a. Md. Mustafizur Rahman, Bangladesh High Commissioner chuan Mizoram lo zin a chak thu sawiin, minister hian Chapchar Kut hmang turin a sawm nghal a ni.