Community Shiled – Arsenal vs City

Season thar tan dawna khelh thin FA Community Shield chu Pathianni zan dar 8:30 khian Wembley Stadium-ah khelh a ni dawn a, Premier League champion Manchester City leh EPL-a pahnihna Arsenal te an inhmachhawn dawn.
FA Community Shield-a hian EPL champion leh FA Cup champion te an intum thin a. Manchester City hi Premier League leh FA Cup-ah an champion kawp vangin EPL-a pahnihna Arsenal in Community Shield an inchuh theih phah.
EPL champion City hian a zawna a vawi thum nan Community Shield an hmachhawn dawn. Community Shield-a vawi hnih an tlawm zawn hnuin Arsenal lakah chak ngei an tum ang. 2021 khan Leicester City lakah City hi an tlawm ri ngawt a, 2022 khan Liverpool lakah 3-1 in an tlawm leh bawk. Arsenal hian Community Shield an chuh hnuhnun ber tum chu kum 2020 khan a ni a, penalty-ah Liverpool an hneh. Wembley-ah bik City lakah hian record an nei tha a, Pathianni zanah chakin trophy chawi an tum ang. Arsenal hian Mancheter United treble champion an nih tum khan Community Shield-ah hian an lo hneh tawh a. FA Cup leh EPL-ah Chelsea an champion kawp tumin United chuan Community Shield-ah an lo hneh tawk bawk. Heti a nih vang hian treble champion City hi Gunners in hneh leh ngei an tum ang.
Pep Guardiola hnuaiah City hian Arsenal an ngam ta riau thung a, vawi 19 an inhmachhawn tawhah vawi 16 ngawt chak zawkah Guardiola enkawl City an tang. Tunhnaia vawi 19 an inhmachhawnah hian City in Arsenal lakah goal 24 zet an thun a, Arsenal in City lakah goal li chiah an thun ve thung. Hetihlai hian Wembley-a an inkhelh hnuhnung pahnihaah Arsenal an chak zawn thung a, heng an chaknate hi FA Cup semi-final-ah ve ve a ni. Season liam ta khan Arsenal in City hi an ngam lo riau a, EPL-ah an champion tak loh nachhan lian tak pawh an elpui lian City laka an tlawm zawn kha a ni. A pumpui thuah chuan Arsenal leh City hi vawi 205 an inhmachhawn tawh a. Arsenal hi chak zawkah vawi 98 an tang a, City vawi 62 chak tawhin, vawi 45 an inhnehtawk tawh thung.
Community Shield hi player thar leh kum naupang zawkte enchhin nan an hmang tlangpui thin a, tunhnaiah erawh an ngai pawimawh thara an player tha ber ber an luhtir chawk tawh. Arsenal hian player langsar pathum an la lut tawh a. British player manto ni tura an lak luh Declan Rice, Chelsea leh Germany forward Kai Havertz leh Netherlands leh Ajax defender Jurrien Timber te City an hmachhawn ngei a rinawm. Player thar pathum an neih lai hian chhuak langsar an awm lem lo thung a, hmuhnawm zawkin an inlan thei tura ngaih a ni. An forward pawimawh Gabriel Jesus erawh chu khup hliam vangin an chhawr thei dawn lo thung.
City hian loan-a an tirhchhuah panga an kokir tawh a, Chelsea atangin midfielder Mateo Kovacic an la lut. Hetihlai hian an midfielder pawimawh, FA Cup final-a goal hnih thuna champion puitu Illkay Gundogan chu Barcelona panin a chhuak a. An winger Riyad Mahrez chuan Saudi Pro-League club Al-Ahli a zawm tawh bawk. EPL champion hian defender tha tak Josko Gvardiol an la lut ngei dawn niin a lang a, Arsenal an hmachhawn hunah erawh Croatia defender hi an la chhawr hman dawn lo thung. Squad nei chhah sa tak mai an ni a, Arsenal lakah hmuhnawm taka inlan a, hnehna chang thei tura ngaih an ni tho thung.