Compensation dawn hnua in la thiat lo te hrilh nawn

Competent Authority for Land Acquisition (CALA), Serchhip district bawrhsap David Lalthantluanga chuan Nilaini khan Mualpui Chhingchhip VC, Venghlun Chhingchhip VC, Chhiahtlang North & South VC huamchhung a tlawh a. National Highway 54 kawng cheithat mekah NHDICL hmalak dan enfiahin, compensation dawng tawh zingah in leh lo la thiat lo an awm em tih leh an thiah loh chhan a hmunah a endik.
NH-54 kawngpui laih mekah hian Serchhip district huamchhungah sawrkarin ram a lakfel tawh, compensation dawng tawh zinga za zela 93 chuan an in an thiatfel tawh a. Chhan hrang hrang avangin compensation la tawh zingah mahni in la thiat lo an awm tih hriat a ni. Kum 2018 leh 2019 khan bawrhsap chuan 3D notification tichhuakin compensation dawng tur hi a lo tarlang tawh a. Heng mite hian compensation an dawn tawh avangin an ram hi sawrkarin dan angin neitu nihna a nei fel tawh a, tluang taka hna thawh chhunzawm a nih theih nan hun tiam chhungin mahni in thiatfel vek tawh tura beisei an ni. Zangnadawmna la tawh zingah in thiat lo an la awm avangin kumin July leh August khan magistrate-ten an inah kalchilhin thiat tura thupek pek an ni.
Eviction notice dawngtute hian thupek zawm loa, an in an thiat lo a nih chuan sawrkarin dan anga hma lain IPC Sec.188 tlawhchhana thubuai siamsak an ni dawn a. Hetiang thil hi a thlen lohna turin compensation dawng tawh, eviction notice dawng tawh zingah mahni in leh lo thiat lo an la awm chuan, bawrhsap-in thiat vek turin mipui a chah nawn. Chhingchhip leh Chhiahtlang khawchhungah hmun engemawzat a tlawh a. Khaw dang pawh hun remchangah a tlawh chhunzawm ang. Sawrkarin dan leh thupek kenkawh a, thubuai siamsak kher an ngaih lohna turin a ranglama an in thiat turin a ngen.
Chhingchhip leh Chhiahtlanga National Highway Monitoring Committee member-ten bawrhsap hi tawiawmin kawngpui laih meka harsatna awmte, khawtlang mipui mamawhte district hotute hnenah an thlen a. Bawrhsap chuan an thuthlente chu danin a phal chin ang zela hma lakpui a tum thu a sawi. Khawtlang leh ramin hma a sawnna tur leh kawngpui tha kan neih theihna tura sawrkar hmalakna tawiawm turin mipui a sawm a ni.
Kumthar March thla tawpah kawngpui hi hawn hman tum a nih avangin hmanhmawh taka hma lak a tul tih a sawi a ni.