Compensation hnam?

Lunglei district chhung NH-302 kawng zauh hna thawh mekah zangnadawmna la dawng lo ten Lungsen & Rangte VC Area chhunga kawngpui laih hna thawh mek chawlhsan tir tura hmalak an tum a. Lunglei district magistrate chuan hna chawl lova a kal theihna’n Lungsen leh Rangte VC huam chhunga compensation la dawng lote ram tih lovah chuan chhum lo chat lovin hna thawh tur a ni a, he kawngpui siam that hna kal mek tikhaihlak leh tibuai zawnga khawsa an awm a nih chuan an chungah dan angin hma lak a ni ang, tiin tunhnai khan thupek a chhuah ve nghal a.
Tunhma deuh khan ram hruaitu pakhat chuan Mizote hi ‘compensation hnam’ ang hialin a chhuah tawh a. Hei hian sawisel a hlawh thin hle a, opposition party lam pawhin na tak takin an bei let thin a ni. Mi tlemte, hleihluak taka thil ti an lo awm avanga a hnam hminghmerha insawi zel hi chu thil dik a ni hran awm lo e.
British-in India a awp lai atang tawhin ‘The Land Acquisition Act, 1894’ kha a lo awm daih tawh a. India mahnia ro a inrel hnu khan he act behchhan hian siam rem chhoh zel niin hemi dungzui hian state hrang hrangte pawhin mahni inrelbawlna mil turin land acquisition act hi kan nei vek a. Compensation hi dan anga kalpui mek a ni.
Hetih lai hian, keini state-ah chuan (state dangah pawh a ni ve tho maithei a) dikhlel deuha compensation lak tumna a awm thin avangin, dik taka compensation la tur ten an tawrh phah zek thin niin a lang a. Hming lem hmanga compensation lak avanga thubuai awrh ta nawlh nawlh pawh an awm ta awm e.
Compensation hmu turte hian compensation an hmu lawk thei lo a nih a, thuneitute nawr nana anamhni ram chin khawih phal lova tan an lo khawh ve tlat a nih chuan right an nei turah a ngaih theih ang a, mahse, compensation an hmuhna tur pawh ni lo, hmun danga hna kal lai zawng zawng thawk thei lo tura hnathawk lai lo dan emaw, lo tihbuai emaw thleng thleng hi chuan right an nei hranin a rinawm lo.
Hetiang hi kan intihhmuh laklawh tawh a, kan la ching chhunzawm zel a, a la hlawhtling zel thei a nih chuan, ‘dan pawisa lo hnam’ te inti ta ila, a dik duh phian awm e. A chhan chu – compensation la tur ten ram hmasawnna hnathawh mek an dangchat thei a, dan kengkawhtute an ngawi a, mipui an ngawi bawk a, chu chuan state pum a huap a ni.
Thuneitu leh a kaihhnawih department lam pawhin dan anga compensation pek chhuah tur ni na na na hi chu dan angin chingfel vat thin bawk se, hetiang harsatna hi a thleng thin lo tur a ni a.