Compensatory Afforestation leh Mizoram

Aizawl khawpui pumpelhna tur, Muallungthu atanga Sihhmui inkar kawng “Aizawl Western Bypass Road” laih mek chu tunhnai khan PHE Minister-in a tlawh a. He kawng laih hna thawktu R.G Buildwell Engineers Ltd. hotute chu, an hnathawhnaah environment tichhe tam lo zawnga fimkhur tur leh leivungte pawh a paihna tur hmun dik tak (spoil bank) ah ngei paih thin turin a hrilh a. Helai kawngpui laih hnathawh vilzui tur leh enkawlzuitu tur, line department hrang hrangte leh NGO-te telna ‘Committee’ din tura rel a ni bawk.
Social media lamah helai kawng laih meka hnathawh a nih dante chiang takin hmuh tur a awm a. Kawngpui laihna leivungin kawngthlang lam thing hmun zau tak tak a bawh eng duai duai a, kawrah leivung a tling nghek nghuk a, sawi tam ngai lovin a nghawng tur chu a lang sa vek mai.
Helai kawng laih hna thawhnaah hian, project-in kawngpui sir tawn tawn thinghmun a tihchhiat chin atan Compensatory Afforestation Fund chhut chhuah a ni ang a; mahse, tuna leivungin kawngthlang lama thinghmun a tihchhiat zawng zawng hu atan hi chuan CA Fund hmuh a rinawm loh hle a ni. Chumi awmzia chu, CA Fund hmuhna chin aia zau fe thinghmun tihchhiat a ni a, chuta chhapah lui tui a tihbawlhhlawh avangin lui nungchate bakah tui tlantu mihringte harsatna nasa tak a siam bawk.
State hrang hrangin CAMPA(Compensatory Afforestation Fund Management and Planning Authority) Fund an hman dan tarlanna kumin July thlaa tihchhuahah chuan, India ram pumpui hlawhtlinna chu 85% a nih laiin, Gujarat, Chandigarh, Mizoram leh Madhya Pradesh te chu CAMPA Fund hman kawnga target hlenchhuak tha ber (full achievement of targets) ah puan an ni.
Chumi awmzia chu, Mizorama development hnathawhnain forest a tihchhiat ang hu zau zawng (hectare) ang chiah hmun dangah thingphun (plantation) leh vek a ni, tihna a ni. Entir nan: Development hnathawhin thinghmun a tihchhiat zau zawng hi hectare 5,000-a zau lo ni ta se, hmun dang hectare 5,000-a zauah thing phun khah leh vek a ni, tihna a ni.
Kum 2022, July thla khan RTI hmangin Mizorama CAMPA Fund hman a nih dan zawhna chu, Mamit Forest Division hnuaiah CA Fund hmuh a nih ve loh thuin chhan a ni.
RTI zawhna chhannaah chuan kum 2009 atanga July 2, 2022 thlenga Mizoramin CA Fund a hmuh zat chu cheng vaibelchhe 34.26 chuang a ni a. Hetah hian Construction of 132 KV Transmission line (W.Phaileng to Marpara) PowerGrid-in an thawh chu tarlan a ni lawi a. He project atang hian Mizoramin CA Fund a hmuh zat chu Rs 3,55,27,800 a ni a, March 16, 2021-ah Fund hi hmuh a ni. Hetih lai hian India rama 100% achievement nei state zingah tarlan kan ni lawi si hi hriatthiam a harsa ta a ni.
Kan lo hriat ve mai mai atan, afforestation atana thing phunte hi – Theihai, Khuangthli, Ngiau, Char, Tei, Tei Pui, Herhse etc. a ni.
Hetiang thing hmun zau tak tak hi Mizoram hmun hrang hrangah a awm thluah dawn tihna a ni awm e.
Tuna Aizawl Western Bypass Road laih mekin thinghmun a tihchhiat chungchangah hian, ‘environment tichhe tam lo zawnga fimkhur turin a chah’ intih liam mai mai tur chi ni tawhin a lang lo e.