Competitive exam-a tling tawhten tlin ve tumte an tawnhriat sawipui

Competitive exam-a tling tawhten
tlin ve tumte an tawnhriat sawipui
Mizoram Youth Commission chuan Nilaini khan anmahni hmun MINECO-ah career guidance & counselling an buatsaih a. Competitive exam-a tuite leh service-a inziaktling tawhte an inkawm.
MYC chairman Malsawmzuala Ralte chuan lehkha zir chu mihringte mi puitlinga min siamtu a ni, tiin, zirlaite chu an hmalam huna an kawng thlan tur leh an kal dan tur chiang taka an hriat theihnan hetiang workshop hi hmang tangkai turin a fuih.
Zirlaite chu thil kalhmang pangngaia lungawi mai lo tura chahin, hmasawn tura insiamrem a, inruahman thiam zel a pawimawh tih a sawi a. Hlawhtling tur chuan tum mumal tak neih a pawimawh tih hrereng tur leh an kawngzawh chu chiang taka chhut thin turin a ngen bawk.
Christina Lalmuanzuali, MCS; Bryan Zorintluanga, MFS; KC Lalhriatpuia, MSS; Elijah LH Sanga, MCS; Jessica Lallawmzuali, MPS; Lalremruati, MF&AS leh Lalchhuanawma Ralte, MIS te hnen atangin Mizoram state service hrang hrang hnathawh dan leh competitive examination atana inpuahchah dan ngaihthlak a ni.