CON ARTIST SAWKAR INTHLAK PAWHA BUAI VE LO TLATLUM THEI ZELTE MIPUIAH TAL AN TLATLUM TUR A NI LO

Ruatafela Nu
Ka hriat thiam ve phak tawkah chuan khawvelin ‘Con Artist’ tia a vuah leh sawite chu, zahawm taka lan duh si, rapthlak taka mahni mihringpui mai pawh ni lo, mahni chipui ngeite buma sualna uchuak tak tak, tualthah pawh pawisa lo, an thil tih tenghneng leh hnuaihnung (cheap) tak ni mah sela changkang taka che lawi sîte sawi nan an hmang thinin ka hria. Ka hriat dan hi a dik em ka hre lo. Khawvel mihring ‘a zo a vai, a hang a ngo, a eng a sen’ zingah Con Artist an tih chin hi chu ram bung emaw, ram bial emawa sual thil ti-a tal vel, misual thing champ inla high si an ni.
Naupang lam deuh chuan in hre pha lo mai thei e; French serial killer, 1986 a Tihar jail atanga tlan chhuak, bikini killer tia vuah, Charles Sobraj leh Dawood Ibrahim Kaskar, International organized crime syndicate, ‘D-company’ an tih mai khaipa te pahnih hi, misual bum hmang tawpthang, India rama an chet tlat nasat avanga he lai kilkhawrah pawh kan lo hriat ve em em an ni a. An mihring puite chunga an pawi khawiha chin dawklak an neih thin chawia police leh journalist te’n hming hrang hrang an vuah a nih pawhin ‘Con Artist’ tih an ni.
‘Con ‘Artist chu- Sum leh pai hmuh nana tih hreh nei lo. Sum zawnga ram bung leh biala mi pawimawh/hotu lu thawhpui thiam. Thu dik tlemte tela sum hai chhuak thiam. Thurualpui atana ram biala mi rin kai thawhpui thiam. An thil sual tih tenawm tak thup nana khawtlang leh sakhaw huanga tlaktlum nana dik lo taka an sum lak luh phalrai vak vak” ti deuh duah ila kan hre thiam mai ang. Saptawng thumal pahnih lek Mizo tawng let sei ber of the year-ah ka inpuang tawp.
Tihian, Con Artist nihphung ka thiam tawkin ka sawi ta a. Heta tang hian Mizo zingah Con Artist tute nge? Eng zat nge awm? An tam lutuk! Mizo Con Artist te hian Dawood Ibrahim leh Charles Sobraj te angin mi that ve rih lo mah sela, mahni Mizo pui ngei bumna hmanga an rawk tawh dan leh, black money hmanga an intih hausak duh dan rapthlak lutuk en hian, tualthah pawh an hreh teuh lo ang tih kan ring tur a ni.
Mizoramah bumna hmanga sual thiltih lian tak tak kan hre teuh tawh a. Tunlaia Lengpui IAF ram leia financial scandal lian lutukah pawh hian a meizanghlaptuah Con Artist kut a tel ang. Tute nge inthurual tih hi mipuiin kan hai lan a ngai a ni. Thil sual ti tura misual rual intelkhawm, sap tawnga ‘organized crime’ ah hian a khaipa an awm ngei ngei thin. A nih loh leh misual hming chhe sa, hming tha thei tawh chuang lo an hmang tangkai bawk thin. Entir nan a tak tak ni si sawi ila: Ek in kal thei, Mawza manto, Kelpal, Serchhip Dawngzawl ram BSF hnena hralh, Khliehriat, Meghalay atanga Ni khata Sakawrtuichhun industrial growth centre-a lungalhthei vawi 8 rawn phur thleng thei /Truck thlawk thei, Skywalk leh Ropeway scandal a meizanghlaptu berte kha Con Artist fing verther leh bum thiam hmingthang an ni a nih pawhin, khatiang bumna hmanga thil sual lian rapthlaka kha mi mal chauhin an ti thei lo. Thurualpui a neih ngei ngei a ngai a, an nei bawk a, chu chu thil sual ti tura intelkhawm an ni. Ka sawi zinga pakhat, Police Modernization sum it, sual thil ti-a bumna hmanga intelkhawmte chu, supply order petu leh supplier te kha an ni. Chutiang zelin a dang ka sawiah pawh khian an ni.
Aw le, kan rama ‘organized crime’ turu buruzia a lang fiah ta. Kohhranin tan a lak a ngai hle. 2005-06 chho vel atanga Mizoramah hausak chak thalai rual, fake financial institution din a, mahni mihring pui/mahni hnampui ngei tam tak bum a, tlan bo leh sîte kha ka chhui a, lehkhabu “Leibatna Sal Ata Zalenna” tih ka ziak phah. (Mizorama Bank lem ho kha ka la rawn ziak leh ang) Kohhranin tan a lak a tulna em em chu, Bank lem din zinga a tam zawk khan ‘Pathian thu sumdawn nan an hmang hmasa phawt thin. Kohhran an bel a, kohhran rawngbawltute’n an tuipui vak hlawm a nih kha. Kan kohhranah pawh kohhran upa lar deuhin Bank lem dintu pahkhat tawngtai turin a sawm a, kan thum deuh huk a, kan thinlung a maimitchhin hlawm loh hmel hle a, kei phei chu ka meng kuau a. Pawn lama chanchinbu kaltlanga ka beih lai, a tantute nena kan inhnial lai a ni bawk a. Ka bula thute Bank lem chanchin ka lo ka hrilh char char. Chuvangin, tunlai thlenga sual tinreng bul, tangka sum ngaina, a duha duh huam huamte pawh hian inphen nan Kohhran an bel zel dawn! Kohhran a fihlim theih nan thawhlawm pawh duham loh a him. Duham chu milem biakna a ni si a.
Drug Cartel, El Chapo (Joaquín Guzmán), leader of the Sinaloa Cartel pawh kha thawhlawm a thawh tam thin avangin a lawina kohhran, La-Cathedral tih emaw ni khan an hum tlat thin avangin a pian leh a murna Mexico sawkarin an man thei lo. Mizo Con Artist ho pawh hian mi retheite an tanpui a, khawtlang leh kohhran an sipawnsawr a, Infiamna tihhmasawnna lamah an thil phal zual a. ‘Khawvel ram danga mite nen an inang vek.’ Pablo Escobar pawh khan football tournament a sipawnsawr thin, a en peih hle bawk. Khawvel hmun hrang hrang (Mizoram pawh telin) a Con Artist, mihring suat pawisa lo, ruihhloa sumdawngte chuan sipawnsawr hmangin mimal leh pawl, Kohhran nen lam an sum thianghlim lo lak luhin an lei thin tih hi a rinawmin a pawmtlak em em a ni.
Heng thalai/pavalai rual, tangka sum chauh ngaihtuah, ram leh hnam hi tihchhiat vek an tum emaw tih mai tura enga tan mah ti lote hian, sawkar apiang an thawhpui thei zel niin a lang lehnghal a. Sawkar inthlakah an buai ve ngai lo a nih ber mai chu(h)! Chutiang chu an nih vangin an in organized tha em em a, Court lama hnuh luh an harsa si! An sum thianghlim lo (black money) hmanpui duh lah khawtlanga tlawmngai pawl lianpui puite an ni a, sipawnsawr an dil duk duk thin a. Kan tu leh fate pass lawmnaah te thu ni lo lote an sawi ka hre fo mai. Hma lam hun hi kan nei thim asin. Chuvangin hengho chetna leh an popularity ti hniam turin Kohhran tal hian tan la se. Chhiar sen loh tlawh muk ruka sipawnsawr an tum pawhin Kohhran chuan duh lo ngam sela, sual thil ti tura intelkhawmte an tawmim deuh mahna!