Congolese sorkarin president hlui chet velna tihchhuah khap

Congolese sorkarin president hlui chet velna tihchhuah khap
Congolese sorkar chuan an president hlui, Joseph Kabila-a leh a awmna party mite chet velna leh kawmna reng reng chanchinbua chhuah a khap.
Kabila-a hi thla hmasa khan Democratic Republic of Congo-ah hian kir lehin amah thlaktu, President Félix Tshisekedi-a kaihhruai sorkar nen an inkarah boruak tang tak a awm nghal.
Thuneitute hian Kabila-a hi ram phatsan zawnga che leh an sipaite beitu, M23 helho nena inzawmna neia puhin hrek an tum a, amah chuan an puhna hi a pha.
Sorkarin kaihhruaina a siam zawm lo hi hrem theih an ni dawn tih DR Congo-a chanchinbute enkawltua hotu, Christian Bosembe-a chuan a sawi.
Chanchinbu thununtu, Supreme Council of Audiovisual & Communication (CSAC)-in thu an chhuah chungchangah hian M23 thupuangtu chuan an enkawl chin hmuna chanchinbute chuan zalenna an nei tih a sawi.
Kabila-a chuan khapna hi engtin mah a la sawi lo va, a kaihhruai party ziaktu, Ferdinand Kambere erawh chuan a sawisel nasa hle.
Kabila-a hi kar hmasa khan DR Congo khawchhak lama M23-in an thunun lai, Goma khawpuiah hmuh a ni.
M23 a thlawp nia senate-in a vote hnuah phei chuan Kabila hi sorkar sawiseltu langsar tak a ni zui a. An thenawm, Rwanda-in helho hi a pui nia an sawi pawh Kigali-a chuan a phatpui a ni.
Eng thubuaiah mah thiam loh chantir la ni lo, Kabila-a hian thla hmasa khan Congolese sorkar hi na taka sawiselin ‘dictatorship’ tiin a sawi a. Sorkar thupuangtu chuan chhangin ‘engmah pek tur nei chuang lo’ tiin a sawi ve thung.
CSAC khapna chhuah hi activist leh African Association for the Defence of Human Rights President Jean-Claude Katende-a chuan ‘thuneihna hman sualna’ tiin a sawi.
Political analyst Ambroise Mamba-a pawhin khapna siam chu X-ah sawiselin mahni inhnehna mai mai a nih zawk thu a sawi a, miin Kabila-a chungchang leh a chetvelna an ngaihven phah mai mai dawn niin a sawi.
Kum hnih a tlanchhiat hnua DR Congo-a a kir leh hnuah Kabila-a party hian a chet velna chu online-ah a dah chhuak reng a, Goma-a vantlang pawl a kawmna leh sakhaw aiawhte a kawmnate pawh a tel.