Congress a sawrkar loh chuan kan ram a him lo – Lal Thanzara

Congress a sawrkar loh
chuan kan ram a him lo
– Lal Thanzara
Mizoramah Congress a sawrkar chuan hlimna a thleng a, ram a him a. Congress a sawrkar loh chuan ram a him lo tih Congress hruaitu Lal Thanzara chuan a sawi.
Thawhtanni khan MPCC president Lal Thanzara hian Mamit leh a chhehvel khaw thenkhat a tlawh a. An party mite nen an inkawmnaah ZPM leh MNF sawrkarah Mizoramin manganna nasa tak a tawk tih sawiin, Congress a sawrkar chuan Mizoramah thlarau malsawm hlimna a thleng a, Mizoram a him tih a sawi. Kan ram kan hnam a him chu a pawimawh ber, tiin, Congress sawrkarah sakhaw zalenna a thleng a, hnam hnufual leh tlem zawkte an him tih a sawi a ni.
“Kalphung thar sawrkar hnuaiah mipuiah sum lengvak a tlem a, ruihhlo a hluar a, chanchin thar chhiar leh ngaihthlak hrehawm khawpin kan rama thil thleng tha lo a tam. Congress party a sawrkar loh chuan ram a him lo a ni,” a ti
ZPM chu engkim ti theia inngaiin an inzuar a. A tak takah chuan engmah an theih loh zia Mizoram-in a hmu mek tih MPCC hruaitu hian a sawi. Mizoram politics inthlak danglamna bul intanna Aizawl khawpuiah local council inthlanah Congress a chetha ber a, chu chuan Congress party tho leh thuai tura mipuiin an duhzia a lantir tih a sawi.
“ZPM-in a intiam angin phur takin kuthnathawktuten sawhthing an ching a, rilru nâa an awm hi a pawi. MNF sawrkarah kuthnathawktute mangangin chemtum nen Aizawlah kawng an zawh a, ZPM sawrkarah pawh kuthnathawktute rilru na leh mangang hian lungawi lohna kawngzawh a thlen hlauhawm khawpin an rilru a na a ni,” a ti.
Tunah central-ah Congress kaihhruai sawrkar a ding thei reng tawh niin Lal Thanzara hian a sawi a. Mizoramah pawh sawrkarah mipui beiseina a hniam sawt em avangin kum 2028 hmaa inthlan that mai pawh a tul loang tih a sawi theih loh tih a sawi. Congress a sawrkar chuan NLUP changtlung zawk hmangin Mizoram mipuiin hlim takin hmasawnna kawng an zawh leh anga, kan ram a him leh dawn tih a sawi bawk.