Congress danglam ta hi kan duh dan tak – Lalsawta

Tuna Mizorama Congress party a lo danglam chho ta chu an duh dan tak a ni tih Congress president Lalsawta chuan a sawi.
Nilainia Kolasib District Congress Conference, Kolasib-a neih a hmanpuinaah Lalsawta chuan kumin inthlanah Mizoramin ‘change’ a hmu dawn a. Chu ‘change’ chu Congress-in Mizoram tana sawrkar tha pek a duh vangin an thlentir a ni tih a sawi. “Kolasib district-ah a takin kan hmu nghal a. Mizoram thalaiten an beisei ram hruaitu tura thalai an duhna chu Kolasib district-ah a takin a lang. Tuna Congress danglam ta hi kan duh dan tak a ni a, Congress thar Mizoramin a hmu ta,” a ti.
Politics ram hluia chengten sum an hmachhuan a. An ni erawh chuan Lalpa lam an hawi tih MPCC president hian a sawi. MNF-in retheite retheihna chu bahhnukte ang maia ngaia Rs. 25000 an tawktarh chuan dinchhuahna tur a thlen dawn lo tih a sawi a. BJP leh a thawhpui MNF leh BJP thiana siam tum mek ZPM party-ah kan ram dinhmun a thim hle tih a sawi bawk. “Kan ram, kan hnam, kan sakhaw nuaibo tumtu BJP thawhpui ngai lo tur Congress hi Pathian hmanruaah ngai ang u. Central-ah tangrual I.N.D.I.A an chak ngei dawn a, India ramah thlamuang takin Pathian ram chanchintha kan hril leh ang,” a ti.
Duhdah taka sum enkawl avangin Mizoramin leiba kan ngah hle, tiin, Congress party a sawrkar chuan Mizoram sum an siamtha anga, Mizoram mipui tan ‘Tang Puihna’ hmangin mipui dinhmun an siamtha dawn tih Lalsawta hian a sawi a ni.