Congress hotuten eiruk thila CM an puhna ZPM party-in ngaihtuah mek

Congress hotuten eiruk thila CM an puhna ZPM party-in ngaihtuah mek
Chief minister Pu Lalduhoma’n puhna a tawhin dan hmanga hma lak zuinaah ama thutlukna ni loin, ZPM party-in thutlukna a siam thin a. Tunhnaia Congress hruaituten eiruk kaihhnawiha an puhna pawh party-in a ngaihtuah mek niin ZPM Legal Department lam chuan an sawi.
Zirtawpnia ZPM office-a inkhawmah an party Legal Department general secretary Vanlalsiama Pachuau chuan, behchhan mumal awm loin Congress hotu lawk zing amiten chief minister Pu Lalduhoma an puh dan chu a zia lo lam deuh a ni, tiin, an lakah hian thubuai siamsak ngei duhtu pawh an kat nuk a. Case file ngam lo angin opposition lamin chhuah an tum a. Pu Lalduhoma’n a sawi tawh angin, party thutluknaah a innghat a, party lam nghak turin an chah tih a sawi.
Social media lama Pu Lalduihoma lo puh tawhte lakah pawh party thutlukna angin criminal complaint file lo ni tawh a. Case pahnih an file chu Pu Duha thutlukna ni loin party thutlukna a ni tih a sawi. “Tun tuma Pu Duha an puhna pawh hi party-in a ngaihtuah mek,” a ti.
MNF Legal Board vice chairman zawhna siam chhangin ZPM Legal Department hruaitu hian, land chu state subject a ni a. Constitution of India chhunga Entry 18 of the State List, Seventh Schedule ami a ni, tih a sawi. Chutih rualin, acquisition and requisitioning of property erawh Consurrent List-a Entry-42 a awm a ni a. Sawrkarin ram a lakna tura Parliament-in dan a siam an amend dawn a nih chuan, Indian Constitution Article 254(2) phut angin President assent lak a ngai thin a. Mimal ram lakna atana dan siam hian a tum ber chu, ram neitute dikna leh chanvo humhalh sak a ni tih a sawi.
Tunah chuan sawrkar ukil-te court-ah an chak thei ta viau nia report an dawn thu a sawi a. Sawrkar ukil-te case-a chak tur chuan sawrkar kalphung a dik a ngai a, sawrkar hnathawkten court-a inkhinna thubuaiah officer emaw department atangin emawa para wise comment chhangtuten kimchang taka an chhan a ngai thin a. Sawrkar thu leh hla chu sawrkar ukil-ten court-ah an lo dinpui thin a, sawrkar atanga thu mumal dawn a awm loh chuan sawrkar ukil tan chak ngaihna a awm thin lo tih Vanlalsiama Pachuau hian a sawi.
“Tunah chuan case thui tak lokal tawhte a nih lem loh chuan sawrkar ukil-te an chak chho ta deuh zel niin thu kan dawng a. Sawrkarin sum tam tak a hum theih phah a ni,” a ti.