Congress-in duhlohna lantir

Supreme Court-in State Bank of India hnenah March 6 hma ngeia Election Commission hnena electoral bond details pechhuak tura a tih, SBI-in pawhsei a dil an duhlohna lantirin March 7 chhun khan Mizoram Pradesh Youth Congress Committee leh Mahila chu SBI Main Branch kawtah an pungkhawm.
Punkhawmnaa thu sawitu Congress Thalai president Laltawnliana chuan, India ramah political party-ten anmahni inenkawl nan leh ram aiawha thil an tih nan, an campaign nan sum an mamawh theuh a. BJP a sawrkar khan company hoin direct-in party-ah sum pe loin bank atangin ‘electoral bond’ an lei theih nan dan thar an siam a. BJP hi electoral bond dawng hnem ber niin, party donation 54% chu BJP dawn a ni. He dan tharah hian political party-te sum dawn hi RTI hmangin a zawh theih loh a, mipuiin party sum dinhmun an hriat a tul lo tih a ni, tiin a sawi.
Supreme Court thutlukna tharah chuan SBI hi party hrang hrang sum hmuh dan (donation) kumin March 6 hmain ECI-a thehlut turin a ti a, hei hian ram invenhimna lamah pawh nasa takin nghawng a nei dawn tih sawiin, “Tunah hian BJP sawrkar chuan a thuneihna hmangsualin, SBI hotute chu party-te sum hmuh dan ECI-a an thehluh hun tur June 30 thlenga pawtsei turin a ngen a. SBI hotuten SC-ah an hun pawhsei an dil ta a. Hetiang a nih chuan MP inthlanpui zawhah daih SBI hian an thehlut dawn tihna a ni a. BJP hausak dan hi MP inthlan hmain India mipuiin kan hre dawn lo tihna a ni,” a ti.