Congress-in inhlawhna thar sawisel

Congress-in inhlawhna thar sawisel
Aizawl District Congress Committee (ADCC) te’n Nilaini khan thuthar lakhawmtute an kawm a, NDA sorkarin ni za inhlawhna (MGNREGA) thlak a tumna G-RAM-G an duh loh chhan an sawi.
MGNREGA leh G-RAM-G te chu a inletling thawk niin an sawi a, G-RAM-G hnuaiah chuan inhlawh hi an chanvo a nihna a bo mai a ni lo a, gram sabha leh panchayat te thuneihna tiboin, central ruahmanna anga kalpui tur a ni tawh dawn niin an sawi.
“Hei bakah hian central-in a tum vek thin kha 90% leh 60% a tum tawh dawn a, a bak chu a state azirin 10% leh 40% lai state-in a tum a ngai tawh dawn a, state-te tan chuan phurrit a tling a ni. Keini state hian 10% kan tum ve a ngai dawn a, keini ang state pachhe tak tan chuan phurrit nasa tak a ni ang,” an ti.
MGNREGA-ah chuan thingtlanga cheng chhungkaw tin tan inhlawh kha an chanvo a ni a, G-RAM-G hnuaiah chuan inhlawh an dil pawhin pek nge ngei tur tihna a ni tawh dawn lo a, an thawh leh thawh loh leh an hna tur thlengin sorkar laipuiin a rel tawh dawn niin an sawi.
MGNREGA-ah chuan minimum wages anga hlawh inpek a ni a, G-RAM-G hnuaiah chuan Modi-a sorkarin hlawh hi duh ang angin a siam dawn niin an sawi.
MGNREGA hnuaiah chuan gram panchayat leh gram sabha te’n thuneihna an nei a, G-RAM-G hnuaiah chuan thuneihna hi contractor kutah dah a ni an ti a, MGNREGA-ah chuan khua tihhmasawn nana thawh tur a nih avangin contractor rawih khap a ni an ti. Modi-a sorkar hnuaiah chuan thutlukna zawng zawng Delhi atangin an control dawn niin an sawi.
“MGNREGA a tawp chuan hnathawh tur nei lo an pung ang a, mite chu hlawh minimum wages hlawh pha lova chhawr an ni dawn a ni. Khawsak harsat avanga khawpuia pem lut a titam hle dawn a ni. Panchayat leh VC ten thuneihna an hloh bawk ang,” an ti.
Congress thil phutte
8 Inhlawhna tur guarantee pek, hlawhah guarantee pek, langtlang taka kalpui
8 MGNREGA thlak lova a ngai anga kalpui leh
8 Constitution-in a pek anga inhlawh theihna chanvo pek let leh
8 Ram pumah minimum wages atan Rs 400 hman