Congress-in PC an thlaudai

Mizorama political party hlun PC
party thawm a reh a, party dangin inthlan an hmachhawn mup mup laiin PC chuan thawm an nei lo. Congress party-in an lo thlaudai a ni ber a, PC hian inthlanpui lo awm turah candidate an nei dawn lo ta ringawt.
PC party hian inthlanpui lo awm turah candidate an nei dawn lo tih a chiang tawh a, kar hmasa Ningani khan candidate neih loh mai ni se tiin an rel. Hei hi an puangzar lem lo nia hriat a ni.
PC hian Mizoram Secular Alliance (MSA) an dinpuite nena inthlan chuhho turah an inngai a, mahse an beisei angin thil a kal lo. Inthlanah an tangrual dawn lo tih a chiang tawh a, chuvangin party mal pawha din loh mai hi an tum ta tih thu dawn a ni.
PC hian Congress party leh ZNP te nen Mizoram Secular Alliance (MSA) an din a, thil an tihho fo thin hnuah August ni 18 khan Vanapa Hall-ah vantlang inkhawm kovin ‘agreement’ an ziak a ni. MSA hi a la awm tho a, mahse inthlana tanrual tumna a awm tawh lo.
PC party hruaitute sawi danin, MSA an din hian inthlana tangrual turah an inngai a, an indawr zui bawk. Mahse Congress party-in inthlana tanho an rilruk loh thuin an chhang a ni.
An indawr a, PC party hian ziakin Congress party-ah an thlen. Mahse September ni 12 zan khan Congress president-in inthlana tanho an tum loh thu telephone hmangin a hrilh a ni.
PC party hian ziaka an thu thlen hi ziaka chhang ve tura an beisei thu an sawi a, mahse Congress party hian ziakin an chhang rih lo.
Chutianga thu a kal hnu chuan PC party lam hian mahnia inthlan hmachhawn chu tul an ti ta lo a, din loh mai an rel ta a ni.