Congress president-in BJP te mangtha hun ti

Rajasthan, Madhya Pradesh, Chhattisgarh, Telangana leh Mizoram inthlan hun puan a nih hnuah Congress president Mallikarjun Kharge chuan inthlan hun puan chu ‘Heng state atanga BJP leh an thawhpuite mangthana hun’ tiin a sawi.
Inthlan hun puan hi Congress Working Committee (CWC) tena inhmuhkhawmna neia caste census neih an ngiatna nena a hun a inrual chiah a ni.
CWC neihnaah Kharge chuan inthlanna chu lungruala beih a ngaih thu leh thununna tha leh thawhhona tha tak nena hmachhawn a ngai tiin a sawi a.
Kharge chuan, “Public welfare, social justices leh progressive development-te chu Congress party ngai pawimawh ber a ni,” tiin a sawi.
Congress tena caste census an ngiat leh OBC outreach an kalpui chu nasa taka enchhinin a awm dawn a ni. Mahse, press conference neihnaah party chief hlui Rahul Gandhi chuan ‘litmus test’ anga an sawina chu a hnial thu a sawi a.
“Litmus test tih tawngkam te chu politics-ah ni lovin chemistry ah zawk hman a ni,” tiin Gandhi chuan a sawi bawk.
“Caste census hi kan foundation a ni a, kan inpuahcah a ni,” tiin Congress chief hlui chuan a sawi bawk a ni.
Rahul Gandhi chuan an party boruak a that thu sawiin BJP te chuan Rajasthan leh Madhya Pradesh an hloh dawn tia sawiin, “Madhya Pradesh-ah BJP sorkar a tla dawn a. Rajasthan leh Chhattisgarh-ah kan sorkar a ding leh ang a. Telangana-ah pawh sorkar mek BRS a tla ang a, kan sorkar a ding ang a, Mizoram ka tlawh vat bawk dawn,” tiin a sawi bawk.