Congress sawrkarin kut hna thawktute sawhthing a leisak – Lal Thanzara

Congress sawrkarin kut hna
thawktute sawhthing a leisak
– Lal Thanzara
Congress sawrkar laiin ching tura an hrilh hranpa ni lo chungin, kuthnathawktute mangan avangin sawrkarin sawhthing a leisak tih Congress hruaitu Lal Thanzara chuan a sawi.
Zirtawpnia Congress Bhavan-a inkhawmah MPCC president Lal Thanzara’n chuan, ZPM-in Congress party-in thlai thar an lei tawh reng em, tia an zawhna chhangin, “Congress sawrkar lai khan sawhthing chingtute mangangin khatih laia kan CM kha an bel a. CM chuan, ‘ching rawh u’ kan ti a ni lo, ti chungin a lei sak vek a, a hralh chhawnna mai tur a awm loh avangin a tawih a tam tih a sawi. Tuna Rs. 50-a lei tiamtute nen chuan an inang lo hle tih a sawi a ni.
MNF president-in phai lamah pawh Congress an ral mek, tia a sawi thu sawichhawng bawkin, “Tunah hian MLA 10 la nei mah se, Zoram mipui hian an lam an hawi lem lo niin a lang. Cheng nuai 3 sem tumin nuai 1 pawh an sem phak lo,” a ti.
Saiip puan sina sual thupha chawia tawngtai sawrkar kan nei chu a thlamuan thlak viau laiin, sakhaw zalenna rahbeh duhtute an thurualpui chhung chuan malsawmna kan dawn a beisei awm loh tih MPCC president hian a sawi.
“ZPM Thalai-in, BJP nena inzawm angin dawt a vawrh darh, tiin min sawi a, a finfiahna an phut a. He thil hi ka finfiah thiam dan chu, BJP sawrkar hi engvangin nge ZPM sawrkarah hian a inlulin em em a, engvangin nge BJP MLA-te hi chanvo pawimawh pe tura a ngen ngam, tih hi ka chhanna a ni,” a ti.