Congress strategy-in BJP te Karnataka-ah hem

Kum 1985 atang khan Karnataka-ah ruling lai thlan tlin nawnin an awm ngai lo, chu chu kum 2023 inthlan thlengin a la dik zel. Mi tam tak ten kumin Assembly inthlanah majority la an awm lovang an tih laiin Congress te chuan hneh taka chakna changin seat 135 lai lain an vote share pawh 5% laiin an tipung.
Bharatiya Janata Party (BJP) te chuan an vote share ngai an la nei a tih theih a, mahse, an seat lak erawh an chan nasa hle thung a. Janata Dal (Secular) te pawhin an vote share 5% in a hloh bawk.
Congress leh BJP ten inthlanah chakna an chan ngei theih nan an bei nasa hle a. BJP te chuan an nghehna south lam an thlurbing nasa a, Congress-te chuan BJP sorkar chaklohna lai chu remchangah chan tumin an bei thung a.
Lokniti-Centre for the Study of Developing Societies (CSDS) post-poll survey an neihah an mi zawh 10 zela pali (39%) te chuan campaign tan hma hauh atangin an vote tur an tihchian tawh thu an sawi a. Chuta zingah chuan BJP voters te chu 47% niin Congress 37% leh JD(S) te 34% an ni a.
Candidate puan leh campaign kalpui danin danglamna a siam awm bawkin chumi mil chuan voter 10 zela pathum (29%) in vote an thlak bawk a. Chutih laiin hmun lia thena hmun khat 28% te chuan hun tawp dawn ruaiah thutlukna an siam chauh an ti ve thung a. Chung zinga 32% te chuan Congress vote in 31% ten JD(S) te an vote thung a, BJP te vote-tu 23% an awm bawk.
Hei hian chiang takin campaign dan leh Congress leh JD(S) tena candidate an siam chuan voters te ah thusawi a nei tih a chiang hle a. Tualchhung tana ruahmanna an siam a bik takin Congress leh JD(S) te chuan nghawng a nei hle tih a chiang bawk.
Lokniti-CSDS tena inthlan campaign laia poll an lakah pawh 56% lawih te chuan vote thlak dawnin party-in awmzia a nei an ti tawh a. Mi 10 an zawh zinga pali zel (38%) te chuan candidate azir an ti ve thung. Congress voters te chu candidate aia party ngai pawimawh an ni zawk thung a, BJP thlawptute chuan an ngaih pawimawh dan a inang thunga ngaih a ni a. JD(S) voters te zingah erawh candidate aiin party an dah pawimawh zawk thung.
Kum bithliah hrang hrangah Congress te chuan thlawptu an ngah ber a, BJP te chu thalai la naupang deuh rualin an bawh daih thung a. Mak tak maiin education lama hlawhtling college degree nei chinah chuan BJP te thlawptu an tam ber thung a.
Congress te chuan urban leh rural areas-ah vote an hmu tha a, BJP te erawh khawpui chhunga cheng ten an bawh thung. Upper class zingah Congress leh BJP ten thlawptu an neih dan a inmil rualin lower class ah chuan Congress ten 9% lai awhin thlawptu an ngah zawk a.
Congress-te chu rainbow social coalition siamah hlawhtling zawkin Vokkaligas, Kurubas, Dalits leh Muslims te ah an tla na zawk a. Tribals te pawhin BJP aiin Congress an thlawp zawk bawk a. BJP te chu Lingayats community-ah an tla na zawk thung a, Lingayats-te zingah Congress thlawp an tlem tial tial thung. Ahinda (minorities) social coalition lamah Congress te an tha zawk bawk.
Muslims 70% vel lawihin Congress an vote anga ngaih a ni a, mahse, upper caste leh Lingyaats lamah an chhe hle thung. Lingayats 56% lawihin BJP te an vote anga ngaih niin 29% chauhin Congress an vote anga ngaih a ni.
Lingayats leader langsar tak Jagadish Shettar chuan BJP chhuahsanin inthlan dawnah Congress a lut a, mahse, Shettar hi Hubbali-Dharward Central Assembly constitutency-ah hnehin a awm zui thung. Upper caste vote hrim hriah BJP te chu an chungnung hle thung a, OBC vote bikah chuan Congress ten 34% an hmuh laiin BJP te chuan 37% an hmu thung.
Kuruba community, Congress leader Siddaramaiah awmna Dalit community leh Congress president Mallikarjun Kharge pawh a chhuahna ni bawkah chuan Adivasi ten Congress an vote ruih thung a. Heng community-ah te hi chuan inthlan dangah pawh Congress te chu an chungnung hle zel a ni.
Vokkaliga voters te chuan JD(S) an vote ta lo hle thung a, hei mai bakah hian JD(S) te chuan Muslim te vote pawh an hui ta lo. Heng community-te hi tun hma chuan Karnataka-a JD(S) innghahna pawimawh ni thin an ni a, southern Karnataka bikah Assembly seat 51 lai awmna a ni.
Karnataka voters te hi caste-community line-in an inthendarh tih a lang chiang hle a. Traditional Brhamin-Lingayat combination chuan BJP an thlawp laiin a dang zawng ten Congress an thlawp thung a, Ahinda (minorities) social coalition a dingchang leh tihna a ni bawk.