Congress symbol hi Hindu pathian kut – MBJP president

Congress party symbol chu Hindu pathian Shiv Shankar a ni a, Hindi sakhua vuan chunga a dera sakhaw intluk tlanna sawimawi tu an ni tih BJP Mizoram president Vanlalhmuaka chuan a sawi.
Zirtawpnia BJP State office-a inkhawmah Vanlalhmuaka chuan Mizorama Congress party-in BJP chu Hindu party, India ram Hindu rama siam tumtu, Kristian hmelma tia puhin, Mizoram leh Mizo Kristiante an zirtir laiin, Congress leader Rahul Gandi chuan India ram rorelna inpui ber Parliament House-ah BJP chu Hindu an ni loa, Hindu sakhua zahpuitu, Hindu pathian leh Hindu sakhua zahpuitute an ni, tiin a au mek a. Congress zawk chu Hindu party an ni a; an party symbol atan pawh Hindu pathian Shiv Shakar kut ngat an hmang, tiin, Hindu pathian Shiv Shankar poster chu Parliament-a kenglutin, chawimawina hun hman a rawt hial tih a sawi.
“Mizoram Pradesh Congress Committee hian India rama Congress party hi Hindu party, a lema secularism sawimawi a, a taka Parliament hiala Hindu pathian chawimawi duhtute an nih hi an la phatpui zel dawn em? Congress party hi Hindu kulmuk party zawk an nih zia hi an pawm dawn em, tih hi ka zawt a ni,” a ti.
Sakhuana leh politics chawhpawlha mipui mit dawivaiha vote zawng tawh lo turin MPCC chu an ngen tih a sawi a. Tun Parliament Session-ah MPCC leh Indian National Congress chu sakhuana hmanga vote zawng thin an nih zia leh, sakhuana hmanga mipui ngaihdan hruai khaw lo thin an nihna tifiahtu a ni tih a sawi. BJP chu secularism a taka kalpuitu, Constitution-a ding tlat an nih zia tifiahtu a ni thung tih a sawi bawk.