Congress-te hi majority hawtu : Sarma

Congress-te manifesto chuan majority community te ‘hawtu’ an nihzia a pholang a, chu chu an nihna dik tak pawh a ni, tiin Assam Chief Minister Himanata Biswa Sarma chuan Mangaluru-ah a sawi.
“Mi tam tak chuan Congress manifesto chu self goal an ti a. Self goal a ni lo, majority community huatna dik tak a ni. He party history hi ka zir tawh a, Congress character dik tak a ni,” tiin Sarma chuan a sawi.
Manifesto-ah Congress te chuan Popular Front of India (PFI) te India laka firfiaka chete dan pawna hnawl chu Bajrang Dal ‘firfiak pawl ni hauh lo’ te nen intluktlangah an ngai a ni, tiin Sarma chuan a sawi a. Congress ten PFI leh Bajrang Dal te dan pawna hnawl an intiam hian phuba lak an tumzia an pholanna a ni a. “PFI te laka thatchhuah an tumna mai a ni a, demawm tak a ni,” tiin a sawi.
Bajrang Dal activists te chu Karnataka-a moral policing case awrhtir an ni lawm ni tia zawhna a chhannaah pawh Sarma chuan, “Ram tihchhiatna lam chet late leh moral policing case chu intluktlangah eng vangin nge i ngaih theih?” tiin a zawt let a ni.
Congress manifesto chuan Muslims te tan Rs 10,000 crore funds dah leh reservation an tiam bawk a. “Hei tluka Muslim tihlawm tumna a awm lo,” tiin a sawi a.
Congress ‘thutiam’ sawiselin Samra chuan ‘thutiam’ chu Congress te political lexicon a belh thar a ni a ti bawk a. “Political party te chuan inngaitlawm takin tihchian ngei an tum thu an sawi thin a, chutih laiin thutiam engtiangin nge an pek ngawt theih ang,” tiin a sawi bawk a. Eng vangin nge mipui ten Amethi a chak loh avanga Kerala a insawn Rahul Gandhi thutiam an rin theih ang. Congress-te hian Prime Minister Indira Gandhi hun laia retheihna a zung chawpa phawi an intiam kha an la tihlawhtling lo tiin a sawi bawk.
Basavaraj Bommai sorkar eirukna hrang hranga an sawisel pawh chhanin Sarma chuan Congress te hian Bofors scandal a puh leh Bhopal Gas Tragedy-a puh Ottavio Quattrochchi an hum tlat a ti bawk a. “Congress-te hian eirukna an sawi tur a ni lo,” tia sawi bawkin State Congress president D.K. Shivakumar pawh eiruk thubuai nei mek a ni a ti bawk a. “Shivakumar hausakna chu Rs 1,500 crore ah a pung tawh a, Chief Minister Basavaraj Bommai hausakan chu a pung lem lo,” tiin a sawi bawk.
BJP te chuan seat 150 chuang awlsam takin kan la mai ang a, Prime Minister Narendra Modi chuan Karnataka-a BJP sorkar siam a nih ngei theih nan hun tam zawk a hmang ang, a ti bawk.
Congress ten Modi chuan Manipur buaina a ngaihsak lo tia puhna an zawh chungchangah Sarma chuan Modi leh Home Minister Amit Shah te chuan Manipur-a remna leh muanna a awm theih nan theihtawp an chhuah tiin a chhang bawk.