CONMEBOL Copa America 2024: Group D inchingfel ve leh ta…

Nimin, Nilaini zing khan group stage an khel zo a, inchingfel hnuhnungber Group D atangin inhnehtawk team pahnih Brazil leh Colombia-te’n quarter-final an khel dawn a; point li lai hum chunga tla Costa Rica leh point hmu lo Paraguay an haw thei tawh!
Copa America trophy vawikua la tawh leh world champion vawinga ni thei awmchhun Brazil hian an final group-stage match-a Colombia an hneh zawh loh avangin an group-ah runners-up an ni a, Group C winners leh tum 15 tehreng champion tawh Uruguay nen semi-final luh an inchuh a ngai dawn.
Brazil laka point khat hmuhbelh chunga Group D champion ni hlen ta Colombia-in team nem deuh zawk tura beisei Group C runners up Panama an hmachhawn thung ang.
Nilaini zing Levi’s Stadium, Santa Clara, California inkhelah chak se group hmahruaitu ni thei tih inhre chunga bul tan Brazil-in minute 12-na lekah Barcelona winger Raphinha free-kick hmangin hma an hruai mai a, mahse, an tumpuite kha February 2022 hnu lama tlawm la nei lo team an ni tlat a, chawlhlawk hma chiah hun pekbelh tawp hmain Crystal Palace defender Daniel Munoz chuan an siphurh a sut a, second half-ah Brazil-in an khungbelh zo tawh lo.
South American champion vawikhat ni ve zuai tawh Colombia zawk hian chak theihna hun tha bawhpelhin, minute ruk chiah awm tawhah striker Rafael Borre chuan uiawm zetin a hun tha neih a bawhpelh.
An group inkhel dangah Francisco Calvo leh Josimar Alcocer-te goal hmangin Paraguay lakah 2-1-in Costa Rica an chak a, Brazil-in point khat an thawhchhuah ve si avangin beisei tur an nei zui ta chuang lo a ni.
Naktuk zing dar 6:30 hian last eight match hmasaberah champion lai Argentina leh Ecuador an intum dawn a; Inrinni zingah Venezuela leh Canada, Pathianni zingah match hnih awmin, Colombia leh Panama, Uruguay leh Brazil an intum ang.