CONMEBOL Copa America 2024: Semi-final lut hmasaber Argentina

Nimin zingah penalty shootout hmanga Ecuador hnehin world champion Argentina chuan Copa America semi-final an lut a,tukin zing Canada leh Venezuela quarter-final match result tarlan hman loha chak zawk zawk nen final luh an inchuh ang.
Houston khaw inkhelah penalty pet buai kher ngai lo turin hun pangngaiah Argentina an chak teuh hle a, mahse, hun pekbelhah Vennezuela lamin an siphurh an sut a, goal dang luhbelh loin penalty hmangin chak zawk an zawng zui nghal.
Argentina tana chhuih hmasaber captain Lionel Messi chuan thelh mah se midang paliin an khung vek bakah Qatar ram World Cup final-a France ral lian laka a ram chhanhimtu Aston Villa goalkeeper Emiliano Martínez bawk kha ‘shootout hero’ a ni leh a, Ecuador penalty pet vawihnih dangin a team chu 4-2 hnehna a chanpui a, Lionel Scaloni team hi Copa America kal laia semi-final lut hmasaber an ni.
NRG Stadium, Houston-a last eight match hmasaber kan thlirliam takah khan hliam tenau avanga an group match hnuhnungbera chawlhahdam Messi chuan starting line up luahkir mah se hun pangngaiah goal a khung zo lo a, tum khat lehlam pawl goalkeeper a chip khum chuan goal kham a per hlauh a; tarlan tawh angin penalty petah a hlah zui leh bawk.
Duhthusama thain Argentina-in khel chhuak thei lo mah se goal thun hmasa an ni tho a, first half minute 35-ah Manchester United defender Lisandro Martinez chuan corner atanga ball chhuak atangin hmahruaina goal a tilut a, he goal khat hi chakpui mai tur anga an lan hnu hun pekbelh minute khatna a kal mek laiin Kevin Rodriguez chuan Ecuador siphurh a sut a; final tih loh Copa America knockout game-ah extra time khelh a nih loh avangin penalty shootout hmangin chak zawk an zawng zui nghal pawp a, tah chuan Argentina an chungnung zui ta tho a ni.
First half-a sikhat an phurh hnu khan Ecuador lamin an siphurh sut tumin an nawr na viau a; darkar khat an khel tling tihah Ecuador lamin Rodrigo De Paul-a handball vangin penalty an hlawhchhuak a, an captain Enner Valencia cxhuan goal ban petperin Argentina-in hma an hruai chhunzawm zel!
Tarlan tak angin, minute 90 pelh hun pekbelhah Rodriguez chuan Martinez-a dan zawh loh goal hmangin Ecuador siphurh a sut a, semi-final luh lawm tuma inkau phan phan hman tawh Argentina bench lam pawh an zuai leh ta rih a nih kha!
Penalty shootout a ni a, captain Lionel Messi berin thelh mah se Argentina goal-veng Martinez chuan Ecuador tana penchhuak hmasa pahnih Angel Mena leh Alan Minda-te goal tur a dansak a; Argentina tana penchhuak dang Manchester City star Julian Alvarez leh Liverpool player Alexis Mac Allister-te’n khungin, Manchester City defender Nicolas Otamendi chuan chakna penalty a chhuihlut bawk.
Chu mi hmain John Yeboah chuan khungin Ecuador beiseina a siamsak ve hman thuak a, mahse, a goal thun chuan team a chhan zo ta chuang lo a ni.
Arsenal goalkeeper hlui Martinez khan Argentina tan penalty tum 24 a hmachhawn tawhah tum 12 chiah chhuahin, vawikua a dang a, vawithum dang chu dan buai ngai loin goal pawna thlawkchhuak a ni thung.
Quarter-final atanga an tlak rualin Ecuador leh an manager Felix Sanchez chuan inthenna thu an tifel nghal a, Ecuadorian Football Federation thuchhuah chuan contract an ziah anga kum thum hun la nei chunga kalbo ta Spaniard leh a coaching staff hnathawh an hmuh tawh zawng zawnga an lawm thu sawiin, a kal zelna turah duhsakna an hlan nghal.
Defending champion Argentina hi Copa America trophy 15 tehreng la tling tawh an ni a, kumin pawh hian an title kawl lai humhim turin rin an hlawh zual zel a ni.
Inkhelh banah Argentina coach Lionel Scaloni chuan penalty a nih tawh reng reng chuan an team innghahna chu an goalkeeper a nih thin thu leh chu tak chu an bulpui a nih thin thu sawi chungin, “Leo khan thelh mah se innghahna dang goalkeeper kan la nei tho a ni.
“Kan chak dan kha han lawm chiam chi niin ngai lo mah ila kan hlim tho lo thei lo a, mahse, he hnehna hi ka enjoy teh chiam lo,” tiin an chak dan hahdamthlak loh zet chungchang a sawi!
Tarlan tawh angin, an group match hnuhnungber Peru game-a kaihza tha tina Messi khan damkawr chungin bul a tan thei a, beisei angin khel thei chiah lo mah se record thar a siam zui leh ta tho a, he tournament history-a minute khel tam ber a ni.
A captain chungchang sawiin Scaloni chuan, “|ha takin Messi kha a inlan zo thei a, minute nga ruk vel la awmah khan engnge a an tih kan zawt a, harsatna a neih loh thuin min chhang,” a ti.
Ecuador coach Felix Sanchez pawhin Argentina superstar penalty thelh chungchang sawichhuak vein, “Captain a ni a, a inrintawk em avangin penalty pet tur khan a rawn penchhuak hmasaber kha a ni a, mahse, a hlah ve ta tho a, khati ang kha football-ah chuan a thleng ve thin reng a ni. Game hun tam takah khan a la thawhhlawk thoin ka hria,” tiin.
Ecuador khan Copa America bikah Argentina kha an la hneh ngai lo a, Zirtawpni zingah pawh penalty shootout hmangin hnehna ‘chance’ tha tak nei mah se pa uangthuang ve tak Argentina goalkeeper Martinez bawk chu nui hnuhnung berah a tang zui leh ta tho a ni.
Argentina hian goal khat mah chhuah loa match thum chhung hnehna chang fai vek chungin Group A hmahruaitu nihna nen quarter-final an lut a, tukin zing Venezuela leh Canada inkhela chak zawk zawk nen US huna July ni 9 khian Metlife Stadium, East Rutherford, New Jersey-ah semi-final an khel ang.