CONMEBOL Copa America 2024: Uruguay leh Panama tlang ve leh

Nimin zing khan Group C lam an inchingfel a, Uruguay leh Panama chuan group stage paltlangin quarter-final an lut.
A thlengtu United States hnehin Uruguay hian group champion nihna nen Copa America last eight an lut a, Panama erawh Group C runners-up an thung.
United States
0-1 Uruguay
Arrowhead Stadium, Kansas City-a goal awmchhun leh mualneitu team tlawmna goal ni zui ta hi second half tir lam minute 66-a Mathias Olivera tihluh niin, US hi an group-ah pathumna an ni a, group tina point hmu sang pahnih chauhin quarter-final an luh theih avangin group stage an paltlang zo ta lo a ni.
United States head coach Gregg Berhalter chuan an ram tournament-ah group stage pel zo loin a team tlakpui mah se 2026 World Cup-a US team hruai turin amah aia tha an awm loh thu a sawi!
US hian Copa America group stage bul an tanna inkhelah Bolivia hneh mah se Panama leh Uruguay lakah an tlawm a; nimin zinga an chak loh hnu khan Berhalter chu US, Canada leh Mexico ramte inthlentawm tur 2026 World Cup-a US manager ni zui zel turin a la tling tawk em tih an zawt a, ‘Yes’ tiin a chhang!
“Hmalam kan pan zel tur a ni,” la tifantu Berhalter hi 2022 World Cup-a team a hruai dan an chhuichian hnuah June 2023 khan US men’s team coach ni turin an ruat nawn leh kha a ni a, an kawtkai Copa America-ah group stage a pelhpui zawh loh hnu hian a laka thuneitute rilru puthmang a dang dawn em tih zawhna a piang.
US Soccer sporting director Matt Crocker chuan Copa America-a national team sulhnu kha an beisei loh dan a nih thu leh kha aia chetha zawk thei tur an nih thu sawi chungin an team khelh dan an thlirlet tur thu leh 2026 World Cup tinzawn chunga team hmasawn theih dan tur tha ber an zawn tur thu a sawi.
A thlengtu team petchhuaktu Uruguay khan quarter-final lamah Group D runners up team an su dawn a; Panama-in Group D winners an tum thung ang.
He thu buatsaih lai thleng hian point ruk nei tawh Colombia chu Group D hmahruaitu niin, point li nen Brazil-in an dawt a; tukin zing result tarlan hman loh inkhel pakhat zawkah team pahnih hi an group match hnuhnungber ve ve khelin an intum a; an group match dangah Costa Rica leh Paraquay an insu ve thung.
Panama 3-1 Bolivia
Thawhlehni zing Group C inkhel pakhat zawkah last eight lut tura beiseina chhete nei zui thei turin Bolivia khan chak mamawh mah se minute 22-ah Panama tan Jose Fajardo chuan hmahruaina goal khungin, second half minute 69-ah chak mamawh sang zawk Bolivia siphurh hi Ramiro Vaca siamsak atangin Bruno Miranda chuan a sut.
Minute 10 a liam leh tihin Panama bawkin hma an hruai nawn leh a, tuntuma an goal tauhluttu chu Eduardo Guerrero a ni.
Hun pekbelhah Panama tan Cesar Yanis chuan chiang zawka an chakna goal khungin, Inter&CO stadium, Orlando, Florida-ah Panama fans an sapatal!
Central American team Panama khan Copa America-a an vawihnih inlannaah quarter-final an lut thei a, knockout stage an luh vawikhatna a ni.
Thawhtanni zing khan Group B lam inchingfel tawhin, Mexico nena goal awm loa inhnehtawk Ecuador chuan Copa America quarter-final an lut a, an group-a pathumna ni chungin Mexico an tla.
Kum 1993 daih tawha tournament an thlen tuma semi-final an luh hnuah Ecuador-in last four an thleng leh ngai ta lo kha a ni a, kuminah pawh quarter-final lama an sut tur hi defending champion Argentina an nih miau avangin semi-final lut tura beisei an ni lo.
Thawhtanni Group B inkhel danga sithum faia Jamaica sawptu Venezuela chuan group winners nih manah team nen zawk an su thei dawn a, last eight match pakhatah Group A runners-up Canada an hmachhawn ang.
Group A lam hi Pathianni khan group stage an inchingfel tawh a; an thiampuipa Lionel Messi tel loa sihnih faia Peru hnehtu Argentina chuan khelh thuma point kua hmu chungin group hma an hruai tlang a; rin loh taka goal awm loa Chile inhnehtawkpui thei north American team Canada chuan point li hum chungin an group-ah pahnihna dinhmun an luah a, quarter-final an lut daih!
Quarter-final intum dan tur
Keini huna July ni 5, Zirtawpni zing dar 6:30 hian last eight match hmasaberah Group A hmahruaitu Argentina leh Group B pahnihna Ecuador intumin, Inrinni zing dar 6:30-ah Group B hmahruaitu Venezuela leh Group A pahnihna Canada an insu ang.
Pathiannia quarter-final match hnuhnung pahnih khel tur hi he thu buatsaih lai hian a la chiang lo a, match hmasa zawk zing dar 6:30-a Group C runners-up Panama tum tur hi tukin zinga Colombia leh Brazil game khan a hril dawn a; Group D-a pahnihna zawkin Group C hmahruaitu Uruguay an hmachhawn thung ang.

Copa America Table

GROUP A
Team P W D L GD Pts.

Argentina 3 3 0 0 +5 9
Canada 3 1 1 1 -1 4
Chile 3 0 2 1 -1 2
Peru 3 0 1 2 -3 1

GROUP B
Team P W D L GD Pts.

Venezuela 3 3 0 0 +5 9
Ecuador 3 1 1 1 +1 4
Mexico 3 1 1 1 0 4
Jamaica 3 0 0 3 -6 0

GROUP C
Team P W D L GD Pts.

Uruguay 3 3 0 0 +8 9
Panama 3 2 0 1 +1 6
United States 3 1 0 2 0 3
Bolivia 3 0 0 3 -9 0

GROUP D
Team P W D L GD Pts.

Colombia 2 2 0 0 +4 6
Brazil 2 1 1 0 +3 4
Costa Rica 2 0 1 1 -3 1
Paraguay 2 0 0 2 -4 0