Lallunghnema
Charity Lodge
Cont: 9862288182
-- Advertisement --
Consumer Huang min lo chhiarsaktute chibai ka buk vek a che u. He Huang hi lo kâwm zel turin ka ngen che u, a ni.
In ni tin nuna in lo tangkaipui ka beisei êm êm bawk a ni. Consumer-te innghahna leh thupui chu inrenchem tak chunga mi tin mahni thawh chhuah (income) mila khawsak a ni a. Dik taka tih leh rinawm taka nun chu consumer thought, consumer lairil a ni a. Thil man dik taka lei leh tha taka service hman chu smart consumer ze ropui a ni a, dik taka thil hralh hi smart seller mize ropui tak a ni bawk. Ram economy siam that leh tihhmasawnna atan hian consumerism hi a pawimawh hle a. Corruption do nana hmanraw tha ber zinga pakhat ni reng chu consumerism hi a ni.
Consumerism chu hetiang hian Sâp tawngin mi thiamte chuan an hrilhfiah a :
“The protection or promotion of the interest of consumer”, tiin.
Consumer hi sawi dan dangah chuan customer-te hîp(attract) thei ang bera sumdawngten an thil zawrh lai an chei danglam thin hi a ni a. Mahse, Consumer mitah chuan consumerism chu consumer lairil, chakna venhim leh tihchangtlun a ni.
Eng pawh ni se, Consumerism hi chhawra hman tangkai chu consumer tinte mawhphurhna a ni.
Ka article hnuhnung berah khan Consumer Commissiona complaint – te chu ni 90 chhunga chin fel vek tur a nih thute ka rawn tar lang a. Khawvela Court man tlawm ber(cheapest court) leh khawvela Court rang ber(quickest court in the world ) tih a ni a. Consumer Court-te chu Consumer-te tan liau liaua din a ni a. Mipui vantlang tana buatsaih a nih ang ngei a, vantlang rilrem zâwnga heng Court hi kal pui tur a ni.
Centre For Consumer Education chuan hmun hrang hrangah Consumer Outreach Programme hi a lo buatsaih tawh thin a. Consumer Right Awareness atana programme tha tak a ni zel dawnin a lang. A hautak lova, a awlsam hle a. Hall luah man etc.a ngai lova, method tha tak a ni.
June ni 10 khan Centre For Consumer Education huaihawtin Lailen Consulting Private Limited office-ah Consumer Awaress Programme tha takin hman a ni a. He hunah huan Consumer Leaflet “MIPUITE HNENA NGENNA LEH HRIATTURNA, Printing &Stationery Deptt min chhutsak chu Lailen Chief Executive Officer Pu Alan Lalhriatpuia chuan mipui chhiar theih turin a tlangzarh a. Sem chhuah nghal a ni a. Pu Bena, Controller, P&S leh a thawhpuite chungah Centre For Consumer Education chu a lawn em em a ni. He hunah hian Pu C. Rohnuna, Secy, CFCE leh Pu Khamzagina, member-ten Consumer Right leh an tawn hriat te an sawi a. Kal khâwmte hian an hlâwkpui ngei kan ring a ni. He programme chhimtute hi he Firm-a thawk leh trainee -te an ni a. Programme hlawhtling tak ni tura beisei a ni. Consumer-te hnena sem chhuah tur thu ziak ‘Mipuite hnena ngenna leh hriattirna’, hi consumer-te tana thil chi hrang hrang lei leh service hrang hrang hman thua hriat ngei ngei turte an ni a. Thu ziak sem chhuah tangkai tak a ni turin beiseina pawh a sang hle
He Consumer Outreach Programme hman chungchang hi tlai lam news media engemaw zatah puan chhuah a ni a. Media-ho nen hian Centre For Consumer Education kan thawkho tha hle a. CFCE hotute pawh an chungah an lawm em em a ni. Hmun hrang hrangah CFCE chuan Consumer Outreach Programme hmanga feh chhuah an tin tuah mek bawk a ni.
He Consumer Khawvela kan tei kualnaah hian mak tak maiin ka theih ang angin consumer-te zinga harsatna nei, kei teh lul min rawn pun-tute chu ka lo buaipui thin a. He hna hautak tak mai hi keima tha chakna mai chuan ka buan hneh lova. Ka thianpa, ka sangawi zawnpui te, consumer-te harsatna vei em em, huaisen taka bei thintu Pu Hnuna leh thian tha tak tak te hi englai pawh a, a tul phawt chuan che chhuak thei reng an ni a. |henkhat kumte chu lo tam deuh tawh mah se, tleirawl tha za rual ang maiin an che chhuak zung zung mai a. An hmaah chuan thilsual titu te an tawmim thin a ni. Tuna ka thian tha, ka thawhpui, Consumer Activist-te hi kan ram hian a mamawh hle a ni.
Vawiin chu ka consumer note bu ka han kêu lêt a, Aizawl chhuahlam Veng pakhat, Mualpuia cheng Pi Zosangpuii (a rem tihnain a hming ka han lam a ni-llh)Television lei harsatna tawk phak tawka ka lo buaipui chungchang ziahna ka keu fuh a.
Hemi chungchang hi tun tumah hian ka han pho chhuak a ni. Mi entawntlak tak a ni si a. Consumer khawvela ka tawn hriat ka han tarlang thin hi intih lâr tumna avanga ziak ka ni lova. Ka ziah chhan chu consumer-te hian kan dikna leh an chanvo kan hriat loh avanga kan tuar nasatzia leh chu tuarna atanga tal chhuah a tulzia ka sawi duh vang mai chauh a ni. Hetia ka han inpuan avang hian ka chapo lova, ka uang hek lo. Rah beha awm mek thil leitu leh hmangtute tuarna hi a na ém a, sum tam tak hlohna a ni a, pawisa tam tak chânna a ni bawk. Chuvangin kan dikna leh kan chanvote hi chhuhsak a (deprived) kan awm reng kih nan heng thu hi han sawi chhuak mai a ni e.
Mi pakhat Pi Zosangpuii hi a awm a, Television thar a lei a; chu a TV lei chu a en theih lova, a chhia a ni ber. Siam turin dawrah chuan a dah a, mahse, thla hnih liam lai a dah hnu pawhin an siam thatsak lo fova… Chhuanlam fahrah tê tê siamin rei ngiang an kawl a ni. Tichuan, kei tehlul chu he nu khawngaihthlak tak hian a harsatna tawn chu thil tawn min hrilh a. Kei chuan hetianga mi bungrua siam that sak si lohva kawl reng hi Consumer Protection Act 2019 kalh a ni a, consumer forum a khin theih in ni a. Inbe rem teh u, tiin. TV zuartute chu ka va be ve leh ngawt mai a. A tawi zawngin sawi ta mai ila. Anni hian rilru zau tak puin an lo tihfelsak ta a ni.
Heng hi Consumer-te tan hnehna a ni a. Kan tanrual chuan sual hi kan hneh zel dawn a ni. Hetih lai hian kan tanrual loh rah kan la seng zel a. LPGas sem chhuahnaa buk thuah te, home delivery thuah te, connection tihnaah te, kan inlungrual loh pheng avangin kan tuar ta zel a. A ngawng(unaware of the fact) zual pui phei chuan an tuar a ni tih reng an hre si lo cheu va! Chutiangin thil dang, inleisak leh service inhmansaknaah pawh hian ‘ni mai teh se,’ tiin kan thâmral zel zawng a nih hi!