Consumer Right leh Kristian nun

Lallunghnema
Charity Lodge
Cont: 9862288182
Kum thar 2026 kan lo hman chhoh tâk avang hian ka article hmasaah khan consumer-te leh sumdawngte rilru thar an neih a tulzia thu ka sawi nual a. Khatiang thu pawimawh ka sawi avang khan chhiartu engemaw zat chuan rilru thar, ngaihtuahna thar in lo neih ngei ka beisei a ni.
Thil zuartu leh thil hralhtute chuan an thil zawrh chu dawt hmangin zuar lo se, sawi tur dik sawiin zawrh tur dik zuar se. Anmahni pawhin a, an lei hreh ang thil zuarin hralh lo bawk se. Hei hi thil pawimawh tak a ni. Mahni pawhin a lei ngam loh leh lei duh loh zawrh hi sual chi khat a ni. Buk tling lo leh khîn tawk lo te, rilru dik lo te hi setana hmanrua a ni.
Mizoramah Rêl a lo chhuak a, sumdawng leh consumer-ten kan chhawr nasa tan hle. Mahse, thil dik lo tam tak a inphum a, dik lo leh fel lo tam tak hai lan mek a ni bawk. Hetianga rel lo lut hian ram mipui tan malsawmna nasa tak a ni a. Chutih rual chuan consumer-te tan chhiat thlentu a ni thei. Rel avanga thil man tlawm kan beisei rual hian thil tha lo tam tak consumer-te tana chhiatna thlen thei thil a awm tih kan hriat a ngai a ni.
Mizorama consumer-te hian kan awmna hmunin a zir loh avangin hmasawnna tluan tling kan la hmu thei lova. LPGas home delivery pawh kum tam tak vei hnuah kan ti thei ngawr ngawr a. Kan thenawm State Tripura angte hian Gas hi an pu vu vu ve lova, pipe hmangin a thuk-ah an herh haw mai a ni a. Kei ni’n kan sawi a, Mumangah kan la hmu ve tawk tawk chauh a ni si a. Tunah hian kan Sawrkar chuan hma a la mek a, beiseina sang tak nen kan lo thlir mek a ni.
Kristian ramah hian sumdawng Lal Isua hnung zuitu inti an tam namen lo hle a. Anmahni dawrtu an customer-te pawh Kristian tho an ni. Bible thuah chuan thianghlimna te, rinawmna te, dikna leh felna te chu kan hmu a, kan chawi lian a. Mahse, a tak ram(practical)-ah erawh kan la dik lo tluang zel a, kan fel lo tluang zel zawng a nih hi! Pathian Biak Inkhawmnaah erawh kan rinawm hle a. Thu te chu huai tak takin kan sawi a. Dik turin kan infuih a, kan inchah lawm lawm a. A chahtu leh a chahaten kan la bawhchhe tluang zel a, kan tlin chuang na hek lo.
Thuchah sawitute pawh hian an theih loh tur hi min hrilh lo se, tih chu mipui au aw a ni mek. Kristian ram he Zoram zim têa Kohhran Upa leh rawngbawltu te hi politician te, contractor te, sumdawng te an nih chuan an rinawm tur a ni a. An rinawmna chu a ze nghet a ni tur a ni. Mahse, a mak khawp mai Kohhran Upa politician te hi an danglam chuang tlat lo. An nunah danglamna a awm mang tlat lo. Kan thianpa pakhat chuan, “Kohhran Upa politician te chu an nui fimkhur deuhva, an nui ring ve lova, hunserh hmangtu an nih bâk, engteh ual an ni lo. Eiruk an hreh chuang lova, contract hna thawh chu hiat an bansan chuang lova. Pu te tlawn an thiam hle a.
|awngtai rualnaah a tawngtai ring ring an ni a. Dawt sawi an hreh lova, thu tak an ngaina chuang bik lo,” a ti. Hei hi a dik viau chuan ka ring ve.
Consumer Right tih hi Consumer Protection Act 2019-ah hian tarlan a ni ve a. Kan sawi fo mai. A tul a nia nge! Mithiam thenkhat chuan ‘Core consumer rights’ an ti bawk. Chungte chu 6 a ni a, kan la hria em? Consumer Protection Act 2019 Sec2(9)- ah kan hmu. Chungte chu kan sawi nawn leh ang:
1) Right to safety
2) Right to be informed
3) Right to choose
4) Right to be heard
5) Right to seek redressal
6) Right to consumer education.
Kan sawi thin tawh angin heng Consumer Right paruk(6) hi tum nei taka duan chhuah a ni a. Consumer-te zalenna, dikna leh chanvo humhalhsakna hmanrua a ni a. Mahse, a hmangtute hian an zir loh chuan awmze nei lo ‘right’ a ni mai dawn a ni. Huaisenna nena dawrkaite hmachhawn a ngai a, dik tak leh rinawm taka thil lei leh hmang tur kan ni. Tlan chhe chunga thil lei hi mahni inhremna a ni. Dan te hi tha viau mahse, a hmangtute an huaisen tlat loh chuan dan awmze nei lo a ni zel ang. Dan thi sâwn tihna a ni. Consumer dik tak chuan hengte hi a neih a ngai.
Huaisenna, Dikna, Insumtheihna, Hawihhawmna, Dawhtheihna, Nghah peihnate hi!
Tichuan, hengte hi consumer-in a neih chuan, consumer hlawhtling leh entawn tlak a ni. Kristian tha, consumer tha a ni ang. Kristian nun leh consumer nun tha hi a inmil thlap a, then hran theih a ni lova, sawi hran loh tur a ni. Kristiante chuan eirukna hi an huaiin an do tur a ni a. Consumer pawhin a do tur a ni. Tichuan, Kristian consumer tiin kan kaikawp thei ta a. Consumer hlawhtling chu, sumdawng, dawrkai leh thil chi hrang hrang zuartuten dik taka an tih hi a ni a. Kan dam tlannna tur a ni.
Kan thianpa pakhat chuan, “Inrinni khan Bungkawnah hian Bawngsa, a ti hlang 1 kg leh a chanve ka lei a. In ka thlen veleh ka buk tha leh a, 80gram-in a tling lo,” a ti nia! He sa zuartu (sattu) hi kristian tha a nih i ring em?