Consumer-te zin kawng ka zawh mek hi!
Lallunghnema
Charity Lodge
Cont: 9862288182
Kumin hian Consumer Huang hi vawi 40 vel chu he chanchinbu, Aizawl Post-ah hian ka nei ta a. Bahlah lova tluang taka ka kal theih avangin ka lawm hle a. Consumer-te dikna leh chanvo hriatna kawnga Mizo mipui kan harh theih nana ka hmalakna hi a kawng a bumboh hle mai a. A chhuk chho hle a ni. Pathian hruaina chak tak avangin ka la chhunzawm thei zel a. Thawhpui tur pawh ka la hmu thei zel bawk a ni. Heng avang hian ka lawm hle a ni.
Ka lehkhabu bu 8-na Consumer-te Zin Kawng tih chu pho chhuah a lo ni leh ta a. A hming chuan programme siamin ka lo tlangzarh ve thei zel a. Chung tlangzarhna ka neihah chuan hautak lo leh tawi fel ber chiin Pu Zosangliana (ani hian chatuan ram min pansan tawh a – llh) khatih hun laia Tawrhbawm chanchinbu Editor leh MJA President khan MJA Pisa puiah mi tlem tê hmaah a tlangzarh a. Chu ka lehkhabu chu Consumer Right leh Keimah tih a ni a. Hetah hian ka thiante zinga tel awm chhun chu Pu P. Lalupa leh Pu Vanlalngaiate kha an ni mai âwm e. Zan lamah TV-ah tihchhuah a ni ta thova. Local chanchinbuah an chhuah ve a ni. Pu Zosangliana kha rual pawl thiam tak, a bula awm nuam tak a ni. Hetia article ka ziah ve tak viau hian ani, Pu Zotea khan ziak meuhva, an chanchinbu a, article ziak tura min sawmtu kha a ni a. Ani khâ a advance ang reng hle a. Consumer-te veitu dik tak a niin ka hre bawk. Han sawi tâk zelah chuan Khawpui Aw Editor, (mual min liamsan ta) Pu Zaithankhuma Khiangte khan a chanchinbua Consumer Right ziak tura min sawmtu zinga mi a ni bawk a. Ani, Pa Zaia kha chuan “thla tin cheque kan pe ang che” a ti ve bawk. A zât erawh a sawi lo. Tin, heti hi a ni a, Vartian Weekly Editor, Pu Jona pawh khan regular Consumer Column min pe a, article pakhatah cheng 309/- lai min pe ve thin. Tam tham lem lo, lawmthu sawi nan min pe thin bawk.
Zep nak emaw, a hranga hraia article buatsaih hi a buaithlakin a har thin a. Chuvangin chanchinbu hrang hranga ka article-te chu siam rem thain a buin ka khawr pum ta thin a ni. Chanchinbu mite hian min duhsak hle a, Cable TV leh Youtube channel te hian hun min pe viau bawk a, ka lawm hle thin a ni. Heng Media te vang hian ka lehkhabu ziak chu bu 8 lai a lo tling thei ta a. Bu sawm tal tlin ka tum a ni. Mun puitute chungah hian ka lawm hle a ni.
Ka lehkhabute hi lehkhabu dang anga hralh kal a ni ve lo va. Mahse min duhsaktute zarah ka la theh thang zo ve zel chu a ni a. Sawrkar library lam pawhin min duhsak hle thin. Ka lawmna te an ni vek. Hetih lai vek hian ka lehkhabu lo tuipuitu an awm ve mek zel a, lo tangkaipuitu pawh pung zel bawk. |um khat chu Kohhran pakhata inneihnaa ka kal tumin kan u pakhat hian, “Hnema, consumer lam i ziak hi ka tuipui hle thin asin, ziak zel rawh. Ka lo chhiar chhuak dap thin a nia, i thu leh hlate hi ka lo nghakhlel thin hle asin. A bu tê i neih chuan kan ina i lo kal remchân hunah min lo kensak la, ka lo chang ve ang e,” a ti chûl mai a. Chutiang aw mawi chuan min ti lawm hle a, chona tharlâm min pe thin a ni. Ka lehkhabu ziakte hi kan tarlang ve leh hrim hrim ang e. In ning tawh em?
1) Consumer Eng
2) Consumer Right leh Keimah
3) Mipui Chanvo
4) Consumer-te thian
5) Consumer 2020
6) Consumer-te Zalenna
7) Consumer Puitu
8) Consumer-te Zin Kawng
Heng ka lehkhabu chhuahte hian an hming hi pu zo lovin phawk chhuak lo deuh mah se ka tum leh duh ber chu Consumer Awareness, ‘Mizo mipui thinlungah’ tuh a ni a. |angkaipuitu pawh an awm mek zel a, kan la hlim viau zel rih chu a ni e.
Ka zawh lamtluang hi a theuneu lo viau mai. Pathian zarah erawh ka la mualpho lova. Hma pawh kan sâwn ve ta viau mai, ka ti a ni.
Consumer grievances hi buaipui sen loh a awm ta reng mai. Heng consumer complaint te hi ni tin sawisak tur, sawipui tur a awm zel a. He kan zin kawngah hian consumer lunglawmna ka zawng zel a. Kan hmu zel bawk.
Centre For Consumer Education kan din atang phei hi chuan kan kal thui zel, a liluh thuk zel a. Consumer whatsApp Group kan siam atang phei chuan ka buk ta hle mai a. Pathianin thawhpui tur tha min pe a, buaipui tur harsatna tawk an awm zel bawk a. Kan la ti zel, hriselna tha erawh rilru leh taksa tan kan mamawh zual zel dawn a nih hi!
Thlasik a lo ni a, Krismas bazar a lun tan hle. Khawvawt karah Consumer-te bumin an awm leh dawn em? Consumer-te tuarna a thleng leh dawn em? Consumer-te hlim hun nge? Lungngaih hun lo thleng dawn? Zawhna a tam, Krismas Bazar discount? a ni thei em? Sawi tur a va tam em! Ringtu rinawm, ringtu tha lantir hun a ni chhap e.
Consumer Krismas lo thleng se,
Consumer Kum thar lo thleng mawlh rawh se.