Consumer Whatsapp Group thu leh hla Thenkhat

Lallunghnema
Charity Lodge
Cont: 9862288182

Consumer Huang lo chhiar thintute chibai ka bûk vek a che u.
Chhiartute leh min duhsaktute avangin bahlah lovin Consumer Huang hi kan la nei tluang thei zel a. A lawmawm hle a ni. Ka duh leh tum ber chu consumer – tena kan ‘dikna leh chanvo’ kan neih hi a ni a. Consumer Khawvel din a ni.
Kan hriat angin consumer-te hi tun thleng mai hian khawi hmunah pawh kan la chêp êm êm reng a. Ngaihsak kan hlawh lova, ngaihven kan hlawh hek lo. Bazaar leh hmun hrang hrangah dawrkai leh sumdawngte hmuhsitin kan la awm reng a. Consumer kan nih anga engthâwlna aia kan tuarna hi namên lo tak a ni a. Consumer-te rilru nâin min siam a, thinlunga tap teuh chunga mahni in lum pana haw ta nghawng nghawng hi hmuh tur an awm reng a ni.
Nasa taka Consumer Activist- ten hmâ an la chung pawhin mi tam tak chuan an thil lei duh zâwng an la thlang ngam lo fo mai! Duh thlan theihna an neihte hi an la hmang tangkai thei lo a ni. Tlêma hawihhawm fâl deuh dawrkai leh sumdawng zingah awm bawk thin mah se, heng sumdawng leh thil zuartute zinga a tam zawk hi chuan an customer-te chu an lo be tha duh lo a, an lo chapo khum ta thin a ni. Thil zuartu chang an ni lova, public transport service kan sawi thin. Bus Conductor leh Taxi pu tam tak chuan an passenger-te chu an dah “zero” fo mai bawk.
Ka article hnuhnung berah pawh khân Bus Conductor che mawi lo chungchang thu ka ziak nghe nghe a nih kha. A nihna takah chuan kan sawi thin angin, heng Public Transport Service, Bus, Taxi, Maxi Cab, Rail, Air Service etc. te hi passenger neih tama innghat ve mai chauh an ni a. Passenger an neih that chuan an hlawhtling a. Passenger an neih that loh chuan an hlawh chham mai a ni. Chuvangin heng tickets passenger-te hi an tan a pawimawh êm êm a, an hlu êm êm a ni Medical Service pawh an consumer-te kuta innghat an ni. Lo chapo khum hi chu thil inhmeh lo tawp a ni. Hei vang hian alawm, ‘Consumer is King’, kan lo tih thin ni!
Ka’n tuihnih tâlh teh ang: Water Supply(PHE) te, Power Supply(PHE) te hi an consumer-te zara nung an ni a. An hna hi mipui tan a hlu em em a ni. Chutih rualin consumer-te tan malsawmna an ni thei a ni. Buhfai retailer – te pawh anmahni hnuaia Ration latute kuta innghat an ni a. Retailer tan an pawimawh a ni. Retailer chuan Consumer a neih tam a ngai a, Consumer an neih tlem chuan “ei” (commissioned) an nei tlem anga, an tan hlawkna a awm lovang a, hlawkna hmu lo chuan Retailer nihin awmzia a awm lovang a. Dawr khar chu an hmabâk a ni ang.
|um khat Lungleia ka zinin sumo pakhatah hian a luhna lam seat no.1 ka inzep ve a. Driver nen kan titi kawng tluan a, Consumer Right ka sawi a, ngaihnawm a ti phian a. Chu sumo driver chu heti hian ka zawt a. Heti hian min chhang:
Keimah: Maxi Cab-ah hian seat in ‘full’ lo fo thin em? Engnge chutiangah chuan harsatna in neih dan?
Driver: Seat a full loh chuan a buaithlak khawp mai. Bungrua phurh tur hi kan zawng mai mai. Kawng lak (way side) a passenger phurh tur kan dap chung thin a. Restaurant-a chawlh pawh kan inthlahrung hial thin a ni. Passenger kan ‘full’ hi chuan tlan pawh a nuam a, thawh pawh a nuam thin. Passenger ngah hi chuan kan hlim a, a nuam kan ti thin a ni. Passenger-te hi kan sum hnar an nih avangin an pawimawh hle a. Kan VIP an ni, kei chuan ka ti hial thin.
Hêi te mai hi Driver fel tak nena kan inkawmna chu a nih hi! Tunlai hian Driver fel lo an tlêm ta! ka ti ve tlat! |awngtai thei mai ka hre fur a ni. Khawpui chhunga kan Bus Conductor leh Driver-te hian inzir an mamawh hle. A pawimawh ber chu Smart Passenger leh Smart Conductor/Driver hi an ni.
Consumer nih pawh inhre lo, dikna leh chanvo an neih pawh hre lo hi chu chhan chhuah (deliver) ngaihna an awm lo thin a nih hi! Hetih laiin Inveng vâ, i tifel, fel zik uak lo ho hian Zoram khawvel hi thunun an la tum cheu a nih si hi maw le?!
Consumer WhatsApp Group kan siam hi thil chi hrang hrang dahna a ni a. Politics chhe mî chhuah erawh khap a ni. Consumer harsatna nei, thil lei leh service hmangtu zinga buaina leh harsatna neite luh chhuahna leh fuan khawmna a ni a. Consumer Right veitute tâ a ni. Tunlai têa Consumer Whatsapp Group-a message lo lut te hi ka han sawi chhuak zuai dawn a ni.
“March thla khan Zion Street a dawrah pakhatah hian Nehru Coat ka lei a, ka duh ang lo deuh a nih avagin thleng leh ka han dil a, an lo phal lo a. Eng nge ka lei dawnah pawh ka sawi sa kha, ka ti a, a pawisa chuan kan phal lo, a la ti deuh deuh a. Consumer hruaitute hnenah ka thlen dawn em ni? Chutia in phal loh tak tak dawn chuan, ka’n tih zet chuan an aw a lâi ta a. “Ka pu, a kawr kha i duh thlang la, a bang chu kan pe ang che,” a ti a. An Pu ber khan a lo la phal lo deuh a ni âwm e. Hotupa kan bia ang e, ka ti a, ka sawi thaih ti tih a, an hlau khawp mai” – R.Malsawma.
“Nimin tlai khan Mualpui zero point bula sangha zawrnaah sangha ka lei dawn a, KG 1 – ah cheng zahnih sawmnga (Rs 250) an ti a. KG chanve – ah za sawmnga (Rs 150) an ti leh daih bawk si a. Kan han inhnial deuh a nih kha. KG chanve za sawmnga (Rs 150)-a in zawrh chuan KG 1-ah za thum(Rs 300) hisap tihna a ni a. KG 1-ah cheng zahnih sawmnga (Rs 250)a nih chuan KG chanve chu cheng za sawmhnih panga (Rs 125) tur a ni a. Chuvangin cheng za sawmhnih panga (Rs 125) ka pe ang ka ti a. An thin a la rim zui êm êm mawle”! -Mâi
He Bible thu hmang hian ka article hi ka titâwp teh ang.
Thufingte 11:1 Bûkna dik lo hi LALPA mit hmuhin thil tenawm a ni a.
Khî dik chiah erawh chu a lâwm zâwng a ni.
Keima irâwm chhuak ve thung-
“MRP aia sanga thil hralh a, expiry date pelh hnua thil hralh a, ei tlak lo, in tlak lo hralhtute chu Pathian huat zâwng an ni a. Chu’ng ang titu chu a hmuingil lovang”.