Contract health worker-tenhna lak dan siamthat phut

Contract health worker-ten
hna lak dan siamthat phut
Mizoram sawrkar hnuaia Natioal Health Mission programme-a contract-a thawk health worker-te chuan a ngheta sawrkarin health worker lak a tum danah an leng ve lo nia hria in, hna lak tum dan siamthat an phut.
Mizoram Contract Health Workers’ Association hi Nilaini zing khan chief minister chenna, Zarkawt McDonald Hill bulah thuziak kengin an pungkhawm a. Health worker regular post 100 direct recruitment-a lak tur advertisement a chhuah tih sawiin, hun rei tak atanga an lo nghah tawh leh beisei ve em em, an minister pawhin a lo sawihmuh, seniority anga a tahtawla dahnghet tura an ngaih laiin, hetianga ruahmanna a awm chu pawm harsa an tih thu an sawi.
An duh leh beisei angin, sawrkarin post 100 a lak turah mi 50 tal NHM hnuaia contract health worker thawk lai dahnghet tura an phut bakah tuna health worker advertisement chhuakah NHM hnuaia thawk laiten an dil ve theihnan computer certificate nei lo leh kum over tawh, hun rei tak Mizoram hmun kilkhawr tak taka awm thinte, computer zirna hun leh hmun pawh awm lo chu hrethiam a, an dil ve theih dan tur sawrkarin ngaihtuah sak turin an ngen tih an sawi a ni.
The Aizawl Post zawhna chhangin association hruaitute chuan, an punkhawm hnu hian an pawl aiawhten chief minister an hmu a, engmah intiam a neih loh bakah an tlin lohna lai hrilh an lo ni zawk niin an sawi. NHM hnuaia thawkte intelkhawmna – National Health Mission Employees Union Mizoram (NEUM) hnuaiah hma lak chhunzawm a ni dawn tih an sawi a. An pawl bikah hian member 364 an awm a, Mizoram kilkhawr ber thlengin an inzarpharh ve tih an sawi a ni.