Cooperative society-te hriat tur hrilh

Khawzawl district huamchhunga cooperative society 29 hruaitute tan Mizoram State Cooperative Union (MSCU) hmalakna in Thawhlehni khan Khawzawlah training buatsaih a ni.
Training hawnna hmanpuitu district bawrhsap K Lalrohlua chuan Khawzawl chu district nih hnua a tumkhatnan cooperative societies training neih a ni chu lawmawm a tih thu a sawi a. Mizoramah a district angin taima berah a ngai tih sawiin, eizawnna kawngah lakhuihthei, tomato, sapthei, balhla, sawhthing adt. chu khaw hrang hrangah an thar chhuak nasa hle a; heng eizawnna peng hrang hrang hian hma an sawn a, hma an lak chhoh zel theihna turin society dinin sawrkarah an in-register a pawimawh tih a sawi a ni.
Khawzawl district chu district thar a ni a, hmundang atangin Cooperation department-in a la hmui rih a, chutihlaiin district officer leh a dangte Khawzawlah a la dah theih reng a, DC office-ah emaw an thutna tur hmun remchang an ngaihtuahsak thei tih bawrhsap hian a sawi bawk.
Training-ah hian thupui pahnih – ‘Primary society nihphung leh inrelbawlna’ leh ‘Role and importance of Cooperative Leaders’ tih hmangin MSCU atanga kalten zirtirna an pe a. Zawhnate chhan a ni. Training-ah hian Khawzawl district huamchhunga cooperative society 29 atangin hruaitu 87 an tel a ni.