Copa America 2024

Kum 108 zeta upa history nei tawh Copa America football tournament chu kumin hian a vawihnihna atan South America khawmualpui atangin United States of America lamah sawnchhuah a ni leh ta a, tukin zing dar 5:30 khan tournament khuhhawnna inkhelah champion lai Argentina chuan an captain Lionel Messi hoin debutants Canada an hmachhawn a, result tarlan hman a ni lo.
Copa America 2021 leh FIFA World Cup 2022 trophy latu Messi team Argentina hian a zawna major international title pathum lak tlin tumin US-ah kua an hreuh leh mek a ni.
America khawmualpui pahnih atanga football thiam ram 16 inelna hi July ni 15 khian Hard Rock Stadium, Miami-ah final khelin a tawp chauh dawn a ni.
Team 16 chhuakte hi team pali zewlin group palia thensawm an ni a, defending champion Argentina group-ah hian Canada bakah Peru leh Chile an awm.
Group tina a sang pahnih theuhte hian quarter-final an lut dawn a; tarlan tawh angin, Copa America 2024 final hi Miami khawpuia khelh tur a ni.
US ram chhunga stadium 14-ah an inkhel dawn a, kum 2016 khan hlawhtling takin USA hian South America ramte football-a inelna lian ber hi a lo dawl tawh bawk a ni.
Title 15 ve ve hawn tawh Uruguay leh Argentina chu Copa America-a team hlawhtling ber pahnih niin, Marcelo Bielsa team Uruguay hi Group C lamah a thlengtu USA, Panama leh Bolivia-te nen an awmho a, Federico Valverde leh Darwin Nunez-te hmachhuanin kum 2011 hnu lama an title hmasaber tur an beiseina kawngah June ni 24 zing dar 6:30 hian Panama an tum ang.
Vawikaw champion ve tawh Brazil chu Group D-ah Colombia, Paraguay leh Costa Rica-te nen awmhoin, Copa America final hnuhnung berah khan an khelmual hmingthang Maracana Stadium-ah tlawmthlak takin an hmelma lian ber Argentina an ngam lo a, kumin hian America leilungah phuba lak an chak khawpin a rinawm!
Brazil hian hliam avangin an superstar Neymar chhawr thei lo mah se Real Madrid star lian pahnih Vinicius Jr leh Rodrygo bakah player naupang huhang ngah Endrick an kawl a, tla hma tura ngaih chi an ni lo ang!