Copa America 2024: Mexico hneha last 8 lut Venezuela

Nimin zing Group B inkhel pakhat zawkah striker Jose Salomon Rondon (No. 23) penalty chhuihluh hmangin Mexico lakah sikhat faiin Venezuela an chak hram a, Copa America quarter-final an lut.
Inglewood khaw SoFi Stadium inkhela goal lut awmchhun hringchhuaktu penalty kha second half tir lam minute 57-a Jon Aramburu hlawhchhuah niin, box chhungah Mexican player Julian Quinones chuan a titlu a, Salomon Rondon hian Mexico keeper Julio Gonzalez-a tluk lohna lamah chiangzetin a chhuihlut a; he result avang hian Group B atangin point la thawkchhuak ve lo Jamaica an tla fel ta bawk.
Point thum nei ve tawh chunga inlan Mexico hian last eight luh tumin an siphurh sut dan kawng an dap na hle a, hun tawp dawn minute 87-ah handball vangin penalty pawh an hlawhchhuak ve a, mahse, Venezuela keeper Rafael Romo chuan Orbelin Pineda spot kick a dansak a, an opening match-a Ecuador hneh tawh Venezuela chuan point thum dang thawkchhuak leh chungin point ruk nen an group hma an hruai a, khelh khat hmabak la nei chungin last eight an lut ta a ni.
Point thum nena patumna luahtu Mexico-in Pathianniah an chung chiaha point thum ve bawk hum chunga pahnihna thuttu Ecuador an hmachhawn leh ang a, Arizona inkhel hi Group B atanga knock out round lut ve tur dang tichiangtu a ni tawh ang.
Nimin, Ningani zing inkhel dangah Ecuador-in Jamaica hnehin point thum an thawkchhuak a, chu chuan quarter-final lut turin beiseina a la siamsak a; Texas lama tla chiang tawh Jamaica leh tlang tawh Venezuela insu tur chu group champion hriltu game mai a ni tawh ang.
Ecuador 3-1 Jamaica
Nimin zing Group B inkhel dangah Copa America quarter-final luh beiseina nei thar turin Venezuela laka tlawm tawh Ecuador chuan Jamaica lakah point thum hlu zet an thawkchhuak a; Las Vegas result hi ‘Reggae Boyz’ chuan an tlakpui ta a ni.
He match-a goal hmasaber hi Ecuador lam chan niin, tan atanga minute 13-na lekah Jamaica own goal kan hmu a, veilam sir atanga Piero Hincapie crossball vawrhchhuah chu Kasey Palmer chuan a ngalin an lam goal-ah a khaklut palh a ni.
South American-ho bawkin chawlhlawk hma chiahin penalty an hlawhchhuak leh a, Kendry Paez chuan Gregory Leigh handball hrinchhuah spot kick chu goal-ah chantirin, sihnih faiin Ecuador-in hma an hruai phawt.
Second half tan hnu lawkah Jamaica lamin corner atangin Copa America match vawiriat an khelh tawha an goal hmasaber an sualchhuak ve nawlh a; corner ball chu Ethan Pinnock chuan Ecuador goal lamah thawnlutin, Ecuador defence lamin lo dansak mah se ball perlet chu Michail Antonio chuan dan chhunzawm rual lohin a khung a, Jamaican fans thawm a tha ngang mai!
Jamaica beidawng duh lo hian minute 73-ah an siphurh sut zawh theihna hun remchang penalty hmuin an inngai hman a, mahse, referee Cristian Garay chuan khelmual zira an ‘monitor’ hun chu a va endik a, Alan Franco ‘handball’ nia ngaih chu referee berin ‘handball-ah a pawm ve ta tlat lo a, Jamaica beisei spot kick a kawk lo!
Hlauhawng thinphu dep dep renga awm Ecuadorian mipui hahdam huaina turin second half hun pekbelh minute 91-ah classic counter-attack an tih ngei mai hmangin Alan Minda chuan Ecuador chak nemnghehna goal a thawh zui ve leh hram a, goal dang luhbelh tawh loin South American team an chak.
Khati chinah khan Jamaica an tla nghal mai lo a, a hnua khelmual lut tur Mexico leh Venezuela inkhelah an innghat a; Mexico leh Venezuela kha in draw se la emaw Venezuela leh Mexico tlawm se emaw pawh ni se Jamaica tan tlak hriltu a ni dawn a; a chunga tarlan tawh ang khian sikhat faiin South American team an chak hram a, Jamaica lamin khelh khat hmabak la nei chungin United States tournament an mangtha a ngai ta a ni!
Tarlan tawh angin, Group B match hnuhnungah Jamaica leh Venezuela chu Austin, Texas-ah an intum ang a; Mexico leh Ecuador chu Glendale, Arizona lamah an intawng ve thung ang.
Tukin zingah result tarlan hman loh Group C inkhel pahnih awm lehin, zing dar 3:30 khan point thum nei tawh leh a thlengtu ni bawk USA chuan point la hmu lo Panama an hmachhawn a; inkhel dangah point thum ve bawk hum chunga table ler luahtu Uruaguay leh point nei loa a mawngphah luahtu Bolivia an insu ve bawk.
Naktuk zing hian Group D lam an chechhuak ve leh thung dawn a, zing dar 3:30-ah point thum hum chunga an group hmahruaitu ni mek Colombia leh point khat nena pathumna luahtu Costa Rica an intum ang a, dar 6:30-ah point khat nei chunga pahnihna luahtu Brazil leh an match hmasa zawka tlawm chunga table mawngphah luahtu Paraguay an inhmachhawn ve thung ang.