Copa America 2024: Quarter-final lut Argentina

Copa America 2024:
Quarter-final lut Argentina
Nimin zingah sikhat faia Chile hneh hramin defending champion Argentina chuan Copa America quarter-final an lut leh ta phawt a; goal awmchhun hi hun pangngai tawp hma minute hnih chiah awm tawha Lautaro Martinez tihluh a ni.
He inkhelah hian Argentina captain Lionel Messi chuan corner chhuihin, chu ball chhuak atanga ‘shot’ kan hmuh chu Chile goalkeeper Claudio Bravo chuan dangperin, ball letleh tak chu substitute Martínez chuan he match-a goal awmchhun ni tur leh Argentina chakna goal bakah tournament kal laia a goal hnihna ni nghal turin a thun a, hun puma ‘shot’ vawi 21 tehreng nei Lionel Scaloni team hi an chak zo lo tep a ni!
Inkhelh banah goal awmchhun thuntu forward Martinez chuan inkhel harsa a nih thu leh an tumpuite khan tlarhnung an ven nasat thu a sawi a, an hmawr bawk dan erawh a hlimawm tak thu leh point thum hmuh kha an tum a nih thu TyC Sports a hrilh.
Ram tana Martinez-a goal 26-na tur kha a tirah a chiang nghal mai lo a, player-te’n minute thum lai an nghah hnuah video review chuan a nemnghet thei hram a ni.
A hma ni chiaha a kum 37-na birthday lawm zo hlim Messi chuan a tih fo tawh thin angin Chile player-te lakah a ‘talent’ a phochhuak mawlh mawlh a; 2026 World Cup final khelhna hmun East Rutherford, New Jersey-a MetLife Stadium chhung thutna awm zawng zawng luahkhattu mipui 81,106 hmaah Chile defender-te a chingphar leh nasa mai a, mahse, shot vawi 21-ah goal khat an thun thei hram a, corner kick ngawt pawh Argentina khan vawi 10 an hmu a, hun puma shot vawithum nei ve tawk Chile khan corner kick an hmu lo tluan.
An shot neih zinga a hmasaber pawh second half minute 72-ah chauh niin, heti khaw hian Scaloni team chungnung zawk mah se Chilean-hoin an lama goal lut tur an hum tluan thei tep a nih kha!
First half minute 36-ah pen 30 vel zeta hla atangin Messi chuan goal a thun teuh viau a, Bravo veilam goal ban fuhin, Chile an him hram.
He inkhel minute 24-na lekah Gabriel Suazo chhuihna avangin Messi malpui dinglam a na a, physio-te’n an han enkawl that that a, Argentine fans lamin hlauthawng taka an thlir dep dep karah Inter Miamia star hian a khelh chhunzawm thei a, minute 62-ah a siamsak atangin Nicolas Gonzalez chuan goal thun theihna hun remchang hmuin, Bravo chuan goal kham chungah a bilhliamsak.
Second half laihawla Chile-in Argentina goal lama ‘shot’ hmasaber an neih lai khan lehlam pawl chuan vawi 17 an nei hman tawh a; minute 72-a Chile goal zawn hmasakber chuan goalkeeper Emiliano Martinez a pel zo lo a; a hnu lawk minute 76-ah Martinez bawk hian Echeverria goal tur a dansak leh bawk.
Nilaini kha Argentina-in World Cup title an lak hmasakber atanga a kum 46-na niin, 2016 Copa America final-a Chile an hneh lohna khelmual MetLife Stadium-ah bawk team pahnih an intawng leh a; kha mi kum final-a an tlawm hnu lawk khan Messi chuan international a chawlhsan thu a puang a, chawlhkar sarih a liam hnuah sawmna a dawn angin national team-ah a kirleh a; kha mi tum khan lo chawl hlen chu ni se Copa America champion leh world champion ni loin mual a liam dawn hi a lo ni reng a!
US top flight Major League Soccer lama club football khel a ni bawk a, US-ah Messi a lar vet vet hle a, Nilaini inkhelah pawh stadium chhunga fans 90% vel zet khan Argentina jersey an ha a, chu’ng kawr tam ber hnungah chuan Messi hming leh No. 10 a inziak!
Chile goal veng Bravo kha kum 41 mi ni tawhin, Copa America history-a player upa ber ni mah se a la tar lo tih Messi & Co. lakah a lantir a, ram tana match 150 a khelh tlinna inkhelah ‘save’ vawiriat ngawt a nei tling.
Bravo le Messi kha Barcelona lama lo kheldun tawh an nihna lantirin inkhel tan hma hnam hla sa tura khelmual an luh dawna an titi dun lai hmuh tur a awm.
Inkhelh banah Lionel Messi chuan a malpui dinglam na kha ‘serious’ lo tura a beisei thu sawi chungin, “Mi chu a kalh ve deuh a, mahse, ka khel tluan thei ta tho a, a serious lo turah ka ngai a, chetvel erawh a la harsa deuh a, naktuk zing lamah a nghwng neih dan kan hria ang chu,” a ti.
First half-a goal ban petpertu Messi hian Chile game kha tharum mamawh tak a ni leh dawn tih an hre lawksa vek niin a sawi a, game dang pawh tha heh vek ni bawk mah se Chile chu an tough lehzual tih sawi chungin, “Goal-ah an intlar a ni ber a, mahse, kan tum chu kan hlen thei ta tho a, hnehna nen quarter-final kan lut,” a ti.
Group A khelh hnih atanga point ruk hum tawh Argentina kha group hrang hrang atanga knock out round lut hmasaber niin, Inrinni hian Miami khawpuia Peru hmachhawn chungin group stage an khar tawh ang a, he game-ah hian hliam tenau nei captain Messi an hahdamtir phal dawn em kan thlir ang.
Argentina coach Lionel Scaloni chuan hnehna chan kha an phu ve reng tih sawi chungin game awlsam a nih loh thu leh a chhe berah chak hram erawh an tumlawk a nih thu a sawi a; team khawng lakah inrintawkna leh an tlarhma luahtute laka rinna an nghah tlat thu a sawilang tel.
Chakna goal awmchhun khungtu forward Martinez khan national team tana a khelh hnuhnung vawingaah goal nga a thun tling a, tuntum tournament bul an tannaah pawh goal khungin, chuti tak chuan goal khung mar mah se Chile lakah khan bench a luah teh tlat a, Julian Alvarez zawkin luhhmasak a chang.
A forward pahnih a chhawr dan chungchang Scaloni pawhin sawifiah ve nghalin, “Lautaro leh Julian hi kheldun thei an nih reng laiin tuntum kha balance han endik velna atana pakhat zawk bench lama dah kan ni.
“Vawiinah Lautaro chuan goal a khung a, amah kha hlim ber tur a ni a, a dawtah Julian, a pathumnaah kei,” tiin a hmatawng pahnihte inkar bakah an pathum boruak fuhzia a tarlang tel.
Last 16 lut turin khelh hniha point khat chiah la hum Chile khan an group game hnuhnung berah Inrinni hian Canada an hneh a ngai dawn a; Nilaini inkhel dangah rin loh takin Canada hian Peru lakah 1-0 hnehna bawk an sualchhuak ve a ni.
Group A hmahruaitu Albiceleste-in point ruk nei tawhin, point thum nei tawh Canada-in an dawt a, an hnungah point khat ve ve nei Chile leh Peru an awm.
Canada 1-0 Peru
Nilaini zing Group A inkhel dangah rin kai lo zawk Canada chuan minute 74-a forward Jonathan David-a goal thun hmangin South American team an hneh a, pahnihna luah nghet chunga knockout stage luh inbeiseina an nei thar.
Kansas City inkhelah khan second half tir lam minute 59-ah Peru defender Miguel Araujo chu Jacob Shaffelburg laka a ‘foul’ avangin VAR check hmanga hnawhchhuah niin, kha kha north American team nihlawhna bul a ni zui ta a ni!
Copa inbuatsaihna friendly match pahnih leh an bultanna Argentina game-a goal thun zo lo fai vek Canada tan tun kha Copa America tournament-a an chak vawikhatna niin, kumin May thlaa an lakluh manager thar Jesse Marsch hnuaia an chak vawikhatna a ni bawk.
Tukin zing khan Group B lamin round hnihna khel zo ve lehin, Ecuador leh Jamaica, Vennezuela leh Mexico an intum a; fixture-a kan hmuh danin naktuk zingkarah bawk hian dar 3:30-ah tournament thlengtu USA leh Panama, dar 6:30-ah Uruguay leh Bolivia an inhmachhawn ve leh ang.