Ningani zan Spanish Copa del Rey inkhelah an tumpui ve ve hnehin Barcelona leh Real Madrid-in quarter-final an lut.
Spanish football inkhaidiat dana third-tier club AD Ceuta FC khelmualah Catalan team chuan singa faia hnehna changin, Franck Kessie chuan goal khat a thun bakah goal hmahruai khungtu Rapinha goal tur siamsakin, Robert Lewandowski goal hnih lut zinga a hmasa zawk a chhawpsak bawk.
-- Advertisement --
Nuamsaa Nou Camp club-in hnehna an chan zan hian Ansu Fati chuan Barcelona tan goal khat a thawh ve bawk.
Chawlhlawk dawn minute 41-ah Raphinha chuan midfielder Franck Kessie siamsak atangin he inkhela goal hmahruai a tilut a; second half tir lam minute 50-ah Lewandowski goal hmuh tur awm zuiin, hemi hnu hian kum 20 mi Fati solo goal pui takin a chhunzawm a; Kessie goal leh Lewandowski goal hnihna hmuh tur a awm leh.
League leh cup double tura bei mek Barca hian La Liga table-ah hma hruai fal mekin, an hnuai chiaha pahnihna luahtu Real lakah point thumin an sang.
An star midfielder hlui Xavi enkawl Barcelona hian Europe lamah pawh beisei tur la neiin, Europa League play-off round first leg-ah February ni 16 khian Manchester United an mikhual ang.
Ningani zan vek khan Villarreal khelmuala 3-2 hnehna changin Real Madrid pawhin Spanish Copa del Rey last eight an lut ve bawk.
Carlo Ancelotti team hi Etienne Capoue leh Samuel Chukwueze-te goal thun hmangin sihnih faia umtu zawkah an tang hman ren rawn a, seond half-ah Vinicius Jr leh Eder Militao-te goal khat ve ve thun hmanga an siphurh sut zoin, hun pangngai tawp hma minute li chiah awm tawhah Dani Ceballos chuan Bernabeu club chakna goal a khung a, nui hnuhnung zawkah Spanish giants an tang.
Real Madrid hi Champions League last 16 khelh hmabak niin, February ni 21 khian first leg khel turin Liverpool khelmual Anfield an lut ang.